Avropa Liqasını tərk edən "Zirə" Konfrans Liqada "DAK 1904" lə qarşılaşacaq

Oyunun taleyi isə lüksemburqlulara tapşırılıb

UEFA Avropa Liqasının 1-ci təsnifat mərhələsində keçirdiyi iki oyunun (ev və səfər) ümumi nəticəsinə görə bu liqanı tərk edən "Zirə" futbol klubunun bundan sonra mübarizəni davam etdirəcəyi Konfrans Liqasındakı rəqibi, keçirəcəyi oyunun vaxtı və oyunu idarə edəcək hakimlər briqadası müəyyənləşib. Beləliklə, "Zirə" klubu Avrokuboklarda mübarizəni davam etdirəcəyi Konfrans Liqasının ikinci mərhələsində Slovakiyanın "DAK 1904" klubu ilə qarşılaşacaq. İlk oyun iyulun 25-də Bakıdakı "Liv Bona Dea Arena"da keçiriləcək. saat 19:30-da başlanacaq oyunu lüksemburqlu hakim İvo Torres idarə edəcək. Ona öz həmyerliləri olan laysmanlar - Rafael Morimlə Dani Dias kömək edəcək. Dördüncü hakim isə Jasmin Sabotiç olacaq. 

Xatırladaq ki, "Zirə" Avrokubok yarışlarına UEFA Avropa Liqasında başlamışdı. Təəssüflər olsun ki, "Zirə" birinci təsnifat mərhələnin ilk matçında "Şerif"i (Moldova) 1:0 hesabla udsa da, dünən doğma divarlar arasında 1:2 hesabla məğlub olub. Qalibi aşkar etmək üçün qapılara vurulan penaltilər zərbəsində isə qonaqlar daha dəqiq olublar - 4:5. 

İNTİQAM Məmmədov