XIDIR ALOVLU:

TANIŞ OLUN: RAFİQ YUSİFOĞLU

Sumqayıt - 75

Ruhu şad olsun Xıdır Alovlunun! Hələ mən tələbə ikən, 18 yaşım olanda haqqımda belə bir kiçik məqalə yazıb çap etdirmişdi...

TANIŞ OLUN: RAFİQ YUSİFOĞLU

Şeir aləminə qədəm qoyan gənclər üçün ən başlıca, böyük amil onların bu yolda sərt çətinliklərdən, büdrəmələlrdən qorxmayaraq inamla addımlamalarıdır. Belələri gec-tez tanınır, şeirləri ilə ürəklərə yol tapır, oxucusunun sevimli şairi olur. Bu sözləri Rafiq Yusifoğlu haqqında desək, səhv etmərik.

Rafiq Yusifoğlunun indiyə kimi mərkəzi və rayon qəzetlərində bir sıra şeirləri dərc olunmuşdur. Dolğun məzmun, yenilik hissi, az sözlə böyük məna ifadə etmək Rafiq Yusifoğlunun şeirlərinə xas olan ən yaxşı xüsusiyyətlərdir. Rafiq ilk baxışda adi, şeirə “yaramayan” hadisə və əşyaları canlandırmağı, onlara yeni məna verməyi yaxşı bacarır.

Qızdan gələn kəskin sözlü məktub vəfasız, məhəbbəti dilində olan oğlanı qəzəbləndirir. İki gənc arasında gedən bu münaqişə bir kiçik şeirdə canlı, bədii və yığcam şəkildə yekunlaşdırılmışdır:

...Oda atdı o, məktubu. –

Öz yerində titrəyirdi,

Tutulmuşdu dil-ağızı...

Söz oğlanı yandırmışdı,

O, kağızı...

Rafiq Yusifoğlunun yazılarında bu tipli qeyri-adi, orijınal deyimlərə tez-tez rast gəlirik. Rafiq öz üzərində inamla çalışan bir gəncdir. Bu çətin və şərəfli yolda ona müvəffəqiyyətlər arzulayırıq.

Xıdır ALOVLU

“Sosialist Sumqayıtı” qəzeti, 16 noyabr 1968-ci il.