Kişi voleybol millimiz QAL-nı 1 xalla başa vurub

Azərbaycanın Qızıl Avropa Liqasında çıxış edən kişi millisi iyunun 1-də turnirin Estoniyada təşkil edilən 3-cü turunda (mərhələsində) son matçını Lüksemburqa qarşı keçirib. Təəssüflər olsun ki, ilk 5 oyunun hamızında meydanı məğlub durumda tərk edən Fərid Cəlilovub yetirməli məğlubiyyət sindromundan çıxa bilməyib. Amma 0:3 hesabla uduzduğu oyunlardan fərqli olaraq, bu dəfə millimiz 3:2 (25:20, 22:25, 21:25, 25:17, 15:11) hesabla məğlub olaraq, nəhayət ki, aktivinə bir xal yazdıra bilib. 

Bununla da kişi voleybol komandamız ilk dəfə qatıldığı Qızıl Avropa Liqasını 12 komanda arasında 1 xalla son pillədə başa vurub. 

Qeyd edək ki, reqlamentə görə, 12 komanda arasında ən yaxşı göstəriciyə malik olan 4 komanda mübarizəni "dördlər finalı"ndan (pley-offdan) davam etdirmək hüququ qazanıb. 

İyunun 2-də isə baş məşqçisi Faiq Qarayev olan qadın yığmamız analoji turnuirin üçüncü turunda son matçına çıxacaq. Xatırladaq ki, son turun oyunlarını doğma divarlar arasında (Bakı Voleybol Mərkəzi) keçirən və mayın 31-də Estoniyaya qarşı keçirdiyi ilk oyunda 3:0 hesablı qələbəyə nail olan qadın yığmamız iyunun 2-də eyni məkanda Avstriya millisini sınağa çəkəcək. 

Yeri gəlmişkən, qadın millimiz 5 oyundan sonra topladığı 6 xalla 12 komanda arasında 6-cıdır. 

Qadınların yarışında da ən yaxşı 4 komanda mübarizəni pley-offda davam etdirəcək. 

İNTİQAM Məmmədov