Nərəkənddə triatlonçuların "İronWinD-113" yürüşü keçirilib

Mayın 26-da Nərəkənddə (Pirallahı) Gənclər İdman Nazirliyi , Azərbaycan Triatlon Federasiyası, Bakı Şəhər Halqası Əməliyyat Şirkəti və "Triterra" Bakı Triatlon Klubunun birgə təşkilatçılığı ilə "İronWinD - 113"  yürüşü keçirilib. Qeyd edək ki, Qafqazın ən uzun triatlon yarışı olan bu yürüşdə ev sahibi Azərbaycanla yanaşı, Özbəkistan, Qazaxıstan, Rusiya, Belarus, Böyük Britaniya, Birləşmiş Ərəb Əmirlikləri, Ukrayna, İrlandiya və Gürcüstandan olan 200 idmançı medallar uğrunda mübarizə aparıb. Yarışın proqramına 1,9 km üzmək, 90 km veloyürüş və 21,5 km kross qaçışı daxil edilib.

Azərbaycan Triatlon Federasiyasından verilən məlumata görə, qadınların mütləq yarısında Kurkus Valentina, Naqle Michelle və Krivetskaya Sofiya, kişilər arasında isə Vasilyev Demis, Vshivtsev Aleksey və Mordasov Oleksandr müvafiq ardıcıllıqla ilk üç yeri tutub.

Qalıb və mükafatçılara layiq olduqları diplom və hədiyyələri Azərbaycan Triatlon Federasiyasının prezidenti Fərid Fərhadzade və Azərbaycan Velosiped Federasiyasının prezidenti Mədət Quliyev təqdim edib.

Yeri gəlmişkən, ilk üç yeri tutan idmançılara müvafiq olaraq 2000, 1000 və 500 manat pul verilib.

İNTİQAM Məmmədov