Əməkdar jurnalist Eyruz Məmmədovun “Qan düşməni” kitabının müzakirəsi keçirildi

Səməd Vurğun adına Mərkəzi Kitabxanada tanınmış yazıçı-publisist və kinossenarist, AYB-nin üzvü, Azərbaycan Respublikasının əməkdar jurnalisti Eyruz Məmmədovun “Qan düşməni” kitabının müzakirəsi keçirilib. Şəhər ziyalılarının, Sumqayıt Dövlət Texniki Kollecinin müəllim və tələbə kollektivinin, kitabxananın əməkdaşları və oxucularının iştirakı ilə baş tutan tədbirin əvvəlində torpaqlarımızın azadlığı və suverenliyi uğrunda şəhid olan vətən övladlarının xatirəsi bir dəqiqəlik sükutla yad edilib. Sonra Eyruz Məmmədovun həyat və yaradıcılığına həsr edilmiş videoçarx nümayiş etdirilib. Tədbiri açan Sumqayıt şəhər MKS-nin direktor əvəzi Natəvan Axundzadə diqqətə çatdırıb ki, kitab müzakirələrinin keçirilməsi yazıçı və oxucular arasında ünsiyyətin yaradılmasına, bədii ədəbiyyata marağın daha da artmasına stimul verir. Eyruz Məmmədovun əsərlərində mövzuların yüksək peşəkarlıqla seçilməsi, baş verən hadisələrin zənginliyi, xarakterlərin müxtəlifliyi oxucunu kitabdan ayrılmamağa sövq edir. Tədbirdə Gülnarə Cəmaləddin, Hümbət Həsənoğlu, Akif Şahbazlı,Hafiz Eynullayev, Sovet Şükürov, Sübhan Quliyev, Rafiq Mehdiyev, Xatirə Fərəcli kimi ziyalılar çıxış edərək “Qan düşməni” kitabı haqqında öz fikirlərini bildirdilər və yazıçıya öz suallarını ünvanladılar. Tədbir boyu Eyruz müəllim yaradıcılığı ilə əlaqədar oxucuların ona ünvanladığı sualları cavablandırıb və ən yaxşı suala görə üç nəfər oxucuya öz kitablarını hədiyyə edib. Sonda Eyruz müəllim tədbirin təşkilatçılarına öz təşəkkürünü bildirib oxucularla birlikdə xatirə şəkli çəkdirdi.