Güləşçilərin Dünya Olimpiya Təsnifat turniri başlayır 

Mayın 9-dan 12-dək Türkiyənin İstanbul şəhərində güləş üzrə Dünya Olimpiya Təsnifat turniri keçiriləcək. Azərbaycan Güləş Federasiyasından verilən məlumata görə, Paris-2024 Olimpiya Oyunlarına lisenziya xarakteri daşıyan son yarışda ölkəmizi 9 (4 kişi, 5 qadın) güləşçi təmsil edəcək.

Turnirin proqramına əsasən yunan-Roma güləşçilərimiz turnirin ilk günlərində mübarizə aparacaqlar. Yığmanın heyətində yer alan Murad Məmmədov (60 kq), Rafiq Hüseynov (87 kq), Murad Əhmədiyev (97 kq) və Sabah Şəriəti (130 kq) ölkəmizə olimpiya lisenziyası qazandırmağa çalışacaq.

Qadın güləşçilərin yarışında isə Mariya Stadnik (50 kq), Gültəkin Şirinova (53 kq), Alyona Kolesnik (57 kq), Ruzanna Məmmədova (62 kq) və Elis Manolova (68 kq) ölkəmizi təmsil edəcək.

I-S kateqoriyalı hakim Asif Şirəliyev isə turnirdə ölkəmizi ədalət qoruyucusu kimi təmsil edəcək.

Reqlamentə görə, hər çəki dərəcəsində ilk 3 yeri tutan (yarımfinalda və bürünc medalçılar arasında keçirilən görüşdə qalib gələnlər) güləşçilər Olimpiadaya vəsiqə əldə edəcəklər.

Xatırladaq ki, güləşçilərimiz indiyədək 8 lisenziyanın sahibidir. Sərbəst güləşdə bütün çəkilərdə (57, 65, 74, 86, 97 və 125 kq), yunan-Roma güləşində isə 67 və 77 kq-da Paris-2024-ə lisenziya qazanılıb. Qadın yığmamızın aktivində isə bir dənə də olsun lisenziya yoxdur.

Təsnifat görüşləri saat 11:00-da başlayacaq, 19:00-da isə finallar keçiriləcək.

İNTİQAM Məmmədov