Futzalçıların ölkə çempionatına yekun vurulub

"Araz-Naxçıvan" layiq olduğu mükafatla təltif olunub 

Bu gün futzal üzrə Azərbaycan çempionatının Yüksək Liqasında baş tutan 20-ci turla 2023\2024-cü illər mövsümünə yekun vurulub. Son turun nəticəsi demək olar ki, yarış cədvəlinə təsir etmədiyi üçün bir növ formal xarakter daşıyıb. Qeyd edək ki, vaxtından əvvəl çempionluğu özünə təmin edən "Araz-Naxçıvan" klubu son turda U-19 yığmanı darmadağın edib - 8:0. Son turda "Rekord klub" meydana çıxmadığı üçün 5:0 hesablı texniki qələbə qazanan "Baku Fayr" klubu mğvsümü əvvəlcədən bəlli olduğu kimi ikinci pillədə başa vurub. "Yasamal" üzərində böyük hesablı (15:6) qələbə qazanmaq isə turnir cədvəlində dəyişikliklə bağlı "Neftçi" üçün heç bir əhəmiyyət kəsb etməyib.

Yekun turnir cədvəli belə olub: Аraz-Naxçıvan – 50 xal,  Baku Fayr - 44 xal, Neftçi – 42 xal, Yasamal – 20 xal, U-19 – 9 xal,  Rekord klub – 4 xal.

Qeyd: Çempionatın yekununda həm klublar həm də futzalçılar müxtəlif nominasiyalar üzrə layiq olduqları mükafatlarla təltif olunublar. "Araz-Naxçıvan"ın çempionluq sevincini qeyd etdiyi həmin tədbirdə "Baku Fayr" gümüş, "Neftçi" isə bürünc medalına çatıb. Müxtəlif nominasiyalara gəlincə, Vitali Borisov ("Araz-Naxçıvan") mövsümün ən yaxşı məşqçisi, Reza Abqun ("Neftçi") 57 qolla mövsümün ən sərrast oyunçusu adına layiq görülüb.

Mukafatları Azərbaycan Futzal Federasiyasının vitse-prezidenti Elşan Abbasov və qurumun baş katibi Kamran Vəliyev təqdim edib. 

İNTİQAM Məmmədov