Elcan Hacıyev Xorvatiyada Avropa çempionu olub 

Azərbaycan 3 medalla komanda hesabında Avropada ikinci yeri tutub 

Aprelin 25-də Xorvatiyanın paytaxtı Zaqrebdə kişi və qadın cüdoçular arasında startı verilən və Azərbaycan təmsilçilərinin də iştirak etdiyi Avropa çempionatina aprelin 27-də yekun vurulub. Üç gün davam edən çempionatın son günü də Azərbaycan komandası üçün uğurlu olub. Belə ki, son gündə tatamiyə çıxan üç cüdoçumuzdan biri - Elcan Hacıyev (90 kq) bütün görüşlərini qələbə ilə başa vuraraq, qızıl medal qazanıb və Avropa çempionu olub. O, çempionluq zirvəsinə gedən yolda ilk olaraq ev sahibi Yasin Bulici, ardından Tristani Mosaxlivslini (İspaniya) və ən reytinqli cüdoçu olan gürcüstanlı Olimpiya çempionu Laşa Bekaurini məqlub edərək yarımfinala yüksəlib. Burada isə Haciyev Rumıniya təmsilçisi Aleks Kretanidən güclü olub. Həlledici finalda isə cüdoçumuz macar cüdoçu Kristof Totunu məğlub edərək, həm komanda yoldaşı Murad Fətiyevin yarimfinaldaki məğlubiyyətinin qisasını alıb, həm də Avropa çempionu adını qazanıb.

Yeri gəlmişkən, Hacıyevlə eyni gündə və eyni çəkidə tatamiyə çıxan Murad Fətiyev isə yarımfinaldan sonra bürünc medal uğrunda kiçik finalda Laşa Bekauri ilə bacarmayıb. Nəticədə, o, çıxışını 5-ci pillədə başa vurub.

Son gün tatamiyə çıxan digər təmsilçilərimiz - 100 kq çəki dərəcəsində güləsən və çempionata son Avropa çempionu kimi qatılan Zəlim Kotsayev də çıxışını 5-ci pillədə bitirməklə çempionluq titulunu itirib.

Xatırladaq ki, çempionatın ilk iki günündə Azərbaycan komandasının üzvlərindən Hidayət Heydərov (73 kq) qızıl, Balabəy Ağayevsə (60 kq) gümüş medal qazanıb.

Beləliklə, Azərbaycan Avro-2024-u 3 (2-1-0) medalla və iki çəkidə 5-ci yerin sahibi kimi komanda hesabında ikinci pillədə başa vurub. Birinci yeri Gürcüstan (2-1-3) tutub. İlk üçlüyü isə bir dəst medalla Fransa (1-1-1) tamamlayıb. İspaniyanın (1-0-2) dördüncü olduğu çempionatda ev sahibi Xorvatiya (1-0-1) Top-5-ci, Türkiyə (0-1-2) isə 11-ci olub. 

İNTİQAM Məmmədov