Boksçuların Avropa çempionatı davam edir 

Boksçumuz Alfonso Dominqes 1/4 final, qadınlarımız isə start döyüşünə çıxacaqlar 

Serbiyanın paytaxtı Belqradda kişi və qadın boksçular arasında keçirilən Avropa çempionatı davam edir. Bu gün cempionatda biri kişi, üçü qadın olmaqla dörd təmsilçimiz döyüşə çıxacaq. Boksçularımızdan Olimpiya mükafatçısı Alfonso Dominqes (92 kq) 1/4 final, qadınlarımız isə ilk start döyüşünə çıxacaqlar. 

Qeyd edək ki, Alfonso Yan Zaka qarşı 1/4 final döyüşünü qələbəylə başa vuracağı halda yarımfinala yüksələcək və ən azından çempionatın bürünc medalını özünə təmin etmiş olacaq.

Çempionatda mübarizəyə yenicə qatılmaqa hazırlaşan qadınlarımıza gəlincə, Anaxanım İsmayılova (48 kq) erməni Lusine Qevorqyanla, Zeynəb Rəhimova (52 kq) polşalı Nikola Primacjenkoyla, Məhsəti Həmzəyeva (57 kq) isə macar Rebokka Daboşla yumruqlaşaçaq.

Xatırladaq ki, Avropa çempionatına qatılan 18 təmsilçimizdən 5-i artıq 1/4 finala yüksəlib, 6 nəfərsə mübarizəni elə startdaca dayandırıb.

1/4 finala çıxanlar arasında Dominqeslə yanaşı, Sərxan Əliyev (74 kq), Malik Həsənov (63,5 kq) və Amin Məmmədzadə (54 kq) də yer alıb. 

Çempionata aprelin 29-da yekun vurulacaq.

İNTİQAM Məmmədov