Əvvəlcə bürünc, sonra da qızıl medalçılar müəyyənləşəcək

Qadın və kişi voleybol klublarının mübarizə apardığı Azərbaycan çempionatının yüksək liqasında yarımfinal oyunları başa çatıb və bununla da həm bürünc, həm də qızıl medal uğrunda mübarizə aparacaq klublar müəyyənləşib.

Azərbaycan Voleybol Federasiyasından verilən məlumata görə, aprelin 20-də həm kişilərin, həm də qadınların çempionatında üşüncü yer uğrunda oyunlar keçiriləcək.

Bakı Voleybol Mərkəzində keçirilməsi nəzərdə tutulan üçüncülük uğrunda ilk oyun kişilər arasında olacaq. Saat 15:00-da başalanacaq həmin oyunda MOİK "Neftçi" ilə qarşılaşacaq.

Saat 18:00-da isə eyni məkanda qadın voleybol klubları arasında bürünc medalın sahibi müəyyənləşəcək. Həmin oyunda isə "Gəncə" "Murov Az Terminal"la üzləşəcək.

Çempionatın final qarşılaşmaları isə aprelin 22-də və 23-də keçiriləcək. Finallar Bakı İdman Sarayında baş tutacaq.

Aprelin 22-də Bakı İdman Sarayında keçiriləcək final oyunu ilə kişi voleybolçuların mübarizəsində çempion bəlli olacaq. Saat 16:00-da start götürəcək görüşdə “AZERRAIL” və “Murov Az Terminal” kollektivləri üz-üzə gələcəklər.

Aprelin 23-də saat 16:00-da isə qadın voleybolçuların final matçı keçiriləcək. “AZERRAIL” və “Abşeron” komandaları mövsümün çempionunu müəyyən edəcəklər.

Qeyd edək ki, 22-23 aprel tarixlərində final oyunlarından əvvəl dəniz kənarı bulvarda Voleybol Festivalı təşkil olunacaq. Aprelin 23-də final oyunundan dərhal sonra isə qaliblərin (qadınlar, kişilər) mükafatlandırma və Azərbaycan çempionatı Yüksək Liqa yarışlarının bağlanış mərasimi baş tutacaq.

İNTİQAM Məmmədov