Malik Həsənov 1\8-ə yüksəlib, Kamran Şahsuvarlı isə...

Serbiyanın paytaxtı Belqradda kişi və qadın boksçular arasında startı verilən və Azərbaycan boksçularının (13 kişi, 4 qadın) qatıldığı Avropa çempionatı davam edir. Qeyd edək ki, start günü boksçularımız üçün uğursuz olan çempionatın bu günə təsadüf edən ikinci günü daha iki boksçumuz rinqə çıxaraq 1\16 final döyüşünü keçirib. Təəssüflər olsun ki, cütlüyümüzdən biri mərhələ adlaya bilsə də, digəri məğlubiyyətlə üzləşib. 

Azərbaycan Boks Federasiyasından verilən məlumata görə, 63,5 kq-da döyüşən Malik Həsənov gürcüstanlı rəqibi Laşa Qaqnidzedən güclü olaraq, adını 1\8 finala yazdırıb. Polşalı Mixail Yarlinski ilə qarşılaşan Kamran Şahsuvarlı (75 kq) isə məğlubiyyətlə üzləşərək, Avro-2024-lə erkən vidalaşıb. 

Yeri gəlmişkən, çempionatın start günü məğlubiyyətlə üzləşən Tayfur Əliyevlə (60 kq) Murad Allahverdiyevi (80 kq) də nəzərə alsaq, artıq 3 boksçumuz cıxışını erkən başa vurub. 

Çempionata aprelin 29-da həlledici final döyüşləri ilə yekun vurulacaq. 

Xatırladaq ki, çempionatda Azərbaycan da daxil olmaqla 35 ölkədən 400 boksçu mübarizə aparır. Kişilər 13. qadınlarsa 12 çəki dərəcəsində qalibi müəyyənləşdirəcəklər. Azərbaycanın kişi yığması çempionata tam heyətlə, qadınlarımız isə cəmi 4 idmançı ilə mübarizəyə qatılıb. 

Qeyd: Reqlamentə görə çempionatın qalib və eləcə də 2-3-cü yerləri tutan boksçular müvafiq olaraq, 15, 10 və 5 min dollar mükafat qazanacaq. 

İNTİQAM Məmmədov