VOLEYBOL

---------------------

U-18 millimiz EEZVA-da Ukraynaya da uduzub 

İki gündür ki, Gürcüstanın Telavi şəhərində 18 yaşlı oğlanlar arasında voleybol üzrə EEZVA (Şərqi Avropa Voleybol Zonal Assosiasiyası) çempionatı keçirilir. Azərbaycan yığmasının da mübarizə apardığı bu çempionatda bu gün sayca ikinci turun oyunları baş tutub. Qeyd edək ki, baş məşqçisi Cəlil Baxtiozin olan Azərbaycan millisi hesabat turunda Ukrayna komandası ilə qarşılaşıb. Təəssüflər olsun ki, ilk turda Polşaya quru hesabla (0:3) məğlub olan millimiz bu oyunda da eyni hesabla məğlub olub - 0:3 (7:25, 17:25, 18:25). 

Azərbaycan millisi növbəti matçını sabah 3-cü tur çərçivəsində Latviya komandasına qarşı keçirəcək. Bundan sonra voleybolçularımız dekabrın 8-də Estoniya, dekabrın 9-da isə son tur çərçivəsində ev sahibi olan gürcüstanlı həmyaşıdları ilə üzləşəcəklər.

Qeyd edək ki, reqlamentə əsasən, bu turnirdə birinci yeri tutan komanda gələn il gənclər arasında keçiriləcək Avro-2024-ə birbaşa vəsiqə qazanmış olacaq. Yeri gəlmişkən, sözügedən turnirə qatılan Azərbaycan millisinin 14 nəfərdən ibarət heyətində aşağıdakı voleybolçular yer alıblar: Rəvan Məmmədov, Turan Qəhrəmanlı, Rəvan Qəhrəmanlı, Camal Cəlilov, Məhəmməd Qurbanov, Camal Quliyev, Tural Əsgərov, Oqtay Qasımov, Nəriman Bayramlı, Okan İsayev, Muhammad Aslanlı, İbrahim Məmmədov, Məhəmmədtağı Əliyev, İlkin Hüseynli.

İNTİQAM Məmmədov