Yeniyetmə cüdoçularımız AK-nin ilk günü 7 medal qazanıblar 

Aprelin 13-də Berlində (Almaniya) yeniyetmə oğlanlar arasında cüdo üzrə Avropa Kubokuna start verilib. Azərbaycan da daxil olmaqla 37 ölkəni təmsil edən 776 idmançının mübarizə aparacağı turnirdə ölkəmiz 7 çəkidə 15 cüdoçu ilə təmsil olunur. Turnirin start günü Azərbaycan yığması üçün uğurlu olub. Belə ki, cüdoçularımız ilk gündə üçü qızıl, ikisi gümüş və ikisi bürünc əyarlı olmaqla 7 medal qazanıblar. Maraqlıdır ki, 50 və 60 kq çəki dərəcəsində Azərbaycan finalı baş tutub. 50 kq çəkidə həlledici finalda baş tutan Azərbaycan finalında Bahadır Feyzullayevlə Maqomedəli Xusiyev qarşılaşıb. Daha güclü olan Feyziyev qızıl, Xusiyevsə gümüş qazanıb. 60 kq-da reallaşan Azərbaycan finalında isə Nihad Rəhimov Ozqan Quliyevdən güclü olub. Daha bir qızıl medal Kənan Sadıxovun (66 kq) aktivinə yazılıb.

Bürünc medallari isə çıxışını üçüncü yerdə başa vuran Fərid Qarayevlə (60 kq) Umud  Qurbanov (66 kq) qazanıb.

Beləliklə, Azərbaycan komandası medalların sayına görə komanda hesabında birinci gündən sonra 7 (3-2-2) medalla öndə gedir. İkinci yerdə İspaniya (2-0-0), üçüncü yerdə isə Polşa (1-1-1) qərarlaşıb.

Turnirə aprelin 14-də yekun vurulacaq.

İNTİQAM Məmmədov