Daha üç boksçumuz AÇ-da mərhələ adlayıb

Xorvatiyanın Poreç şəhərində gənc boksçular arasında  keçirilən və Azərbaycan boksçularının da iştirak etdiyi Avropa birinciliyi davam edir.  ABF-dan verilən məlumata görə, yarışın ikinci günündə Azərbaycan millisinin daha 3 üzvü rinqə çıxaraq ilk görüşünü qələbə ilə başa vurub və növbəti mərhələyə keçib.

48 kq-da Bilalhəbaşi Nəzərov Eris Sədullahla (Türkiyə) üz-üzə gəlib. Görüş boksçumuzun qələbəsi ilə yekunlaşıb - 5:0 (30:27, 30:26, 30:26, 30:26, 30:27). O, 1/4 finalda irlandiyalı Skot Tompsonla qarşılaşacaq. Döyüş aprelin 11-də olacaq.

Onun uğurunu Ömər Aslanlı (54 kq) da təkrarlayıb. Aslanlı  isə ilk döyüşdə Aleksey Sarıoğlunu (Moldova) mübarizədən kənarlaşdırıb – 5:0 (29:28, 29:28, 29:28, 29:28, 29:28). Boksçumuz aprelin 9-da 1/8 final çərçivəsində fransalı Cemmal Mohamedlə üz-üzə gələcək.

Yığmanın digər üzvü - İbrahim Zeynalov (63,5 kq) da ilk qarşılaşmasından qalib ayrılıb. O, start döyüşündə Sandro Spiçadan (Fransa) güclü olub. Rəqibini 5:2 hesabı ilə məğlub edən boksçumuz 1/8 finalda Emmanuil Fotiadislə (Yunanıstan) münasibətinə aydınlıq gətirəcək. Görüş aprelin 9-da keçiriləcək.

Qeyd edək ki, yarışın ilk günündə Məhəmmədəli Qasımzadə (60 kq) də 1/8 finala vəsiqə qazanıb.

İNTİQAM Məmmədov