Mariya Stadniki lisenziyadan 5 saniyə ayırıb

Aprelin 5-də Milli Gimnastika Arenasında idman güləşi üzrə statı verilən və Azərbaycanın ev sahibliyi etdiyi Avropa Olimpiya Təsnifatli turnir davam edir. Qeyd edək ki, ilk günü Yunan-Roma güləşçilərinin mübarizə apardığı turnirin ikinci günü (6 aprel) isə qadınlar mübarizəyə qatılıblar. 

Bu yarışda ölkəmiz 11 qat Avropa, 2 qat dünya çempionu adını daşıyan, 4 dəfə Olimpiya mükafatçısı olan Mariya Stadnik (50 kq), Elnurə Məmmədova (53 kq), Jalə Əliyeva (67 kq), Birgül Soltanova (62 kq) və Elis Manolovadan (68 kq) ibarət beşliklə təmsil olunub.

Təəssüflər olsun ki, turnirin ilk günü klassiklərimiz üçün uğursuz olduğu kimi, ikinci günü də qadın güləşçilərimizin fiaskosu ilə başa çatıb. Beş təmsilçimizdən heç biri turnirdə qarşıya qoyulan məqsədə çata bilməyib. Hətta yığmamızın lideri, ən titullu güləşçimiz Mariya Stadnik də ümidləri doğrultmayıb. Xatırladaq ki, mübarizəyə 1/4 finaldan qatılan Mariya ilk görüşündə litvalı rəqibi Qabıj Dilyutini təmiz məğlub (10:0) etmək üçün cəmi 51 saniyə vaxt sərf edib və yarımfinala yüksəlib. Burada isə o, finala yüksəlmək və Paris Olimpiadasına lisenziya qazanamaq üçün ukraynalı Oksana Livacla qarşılaşıb. Mariyanın bu görüşü də udaraq finala yüksələcəyi və lisenziya qazanacağı heç kəsdə şübhə doğurmadığı halda, hər şey əksinə olub. Görüşün başa çatmasına 5 saniyə qalanda və Mariya 2:0 hesabla irəlidə olduğu bir anda rəqib gözlənilməz fənd işlədərək hesabı öz xeyrinə (2:4) dəyişməklə, demək olar ki, Mariyanın hazır lisenziyasını əlindən alıb.

Yuxarıda adları çəkilən digər güləşçilərimiz isə mübarizəni elə ilk görüşdəcə dayandırıblar. 

Beləliklə, Bakı-2024 beynəlxalq turnirin ilk iki günü döşək üzərinə çıxan 9 güləşçimizdən heç biri lisenziya qazana bilməyib.

Aprelin 7-də isə sərbəst güləşçilər mübarizəyə qatılacaqlar və bununla da üçgünlük turnirə yekun vurulacaq.

Yeri gəlmişkən, sərbəst güləş yarışlarında ölkəmiz beş idmançı ilə təmsil olunacaq.

İNTİQAM Məmmədov