"Qarabağ" Leverkuzendə "Bayer"in qonağıdır

Bu gün futbol üzrə UEFA Avropa liqasının 1/8 final mərhələsində cavab oyunları keçiriləcək. Sözügedən turnirdə ölkəmizi təmsil edən "Qarabağ" klubu Almaniyanın Leverkuzen şəhərində yerli "Bayer"in qonağı olacaq. Oyunun olduqca gərgin və nəfəsləri kəsən bir matç olacağı heç kəsdə şübhə doğurmur. Çünki, Avropa Liqasının favoriti sayilan və eləcə də Köhnə Qitənin 5 ən güclü milli çempionatından biri olan Almaniya Bundesliqasında şəriksiz liderlik edən ev sahibi qonağını heç də güllə, çiçəklə qarşılamaq niyyətində olmayan biridir. Yeri gəlmişkən, "Bayer" hazırda Bundesliqada 25 oyundan sonra 67 xalla yarış cədvəlinə liderlik edir. O, ikinci yeri tutan "Bavariya"ni 10 xal, cədvəldə üçüncü olan "Ştutqart" klubunu isə 14 xal geridə qoyur.

Qeyd edək ki, taleyi ingiltərəli referi Entoni Teylora tapşırılan oyun Bakı vaxtı ilə gecə saat 00:00-da Leverkuzendəki "Bay-Arena"da başlayacaq. Teylora onun həmyerliləri olan laynsmanlar - Qeri Beusik və Adam Nann kömək edəcək. Matçın dördüncü hakimi isə bu ölkədən olan Endryu Medli olacaq.

Xatırladaq ki, bir həftə öncə Bakıda keçirilən ilk oyunda rəqiblər hərəyə iki qol vurmaqla meydanı sülh şəraitində tərk ediblər.

Yeri gəlmişkən, bu oyun cari mövsümdə cütlər arasında sayca dördüncü olacaq. Belə ki, bu cütlər 1/8 finaldan öncə, turnirin qrup mərhələsində iki dəfə qarşılaşıblar (evdə və səfərdə). Bakıda baş tutan ilk oyunda minimal hesabla (0:1) qalib gələn "Bayer" doğma divarlar arasında isə daha fərqli hesabla qələbə qazanıb - 5:1.

Ümid edirik ki, bu mərhələyə gəlməklə Azərbaycan futbolunda tarix yazan "Köhlən atlar" bütün çətinliyə baxmayaraq yenə də  mərhələni uğurla keçərək yazdığı tarixi yeniləyəcək və Avropanın yaşıl meydanlarında sürətlə irəli gedəcək!!!

İNTİQAM Məmmədov