"Qarabağ" evdə "Bayer"i qəbul edəcək  

Atalar üçdən deyib

 Martin 7-də futbol üzrə UEFA Avropa liqasının 1/8 final mərhələsində ilk oyunlar keçiriləcək. Ölkəmizi bu turnirdə təmsil edən Azərbaycan çempionu "Qarabağ" klubu doğma divarlar arasında Leverkuzenin (Almaniya) "Bayer" klubunu qəbul edəcək. 

Qeyd edək ki, yerli vaxtla saat 21:45-də Tofiq Bəhramov adına Respublika stadionunda başlayacaq oyunun taleyi fransalı referi Benua Basteynə həvalə edilib. Ona öz həmvətənləri olan laynsmanlar - Xişam Zakrani və Orelyen Bertomey kömək edəcək. Daha bir fransalı - Jeremi Pinyar isə matçın dördüncü hakimi olacaq.

Yeri gəlmişkən, bu görüş eyni mövsümdə və eyni turnirdə "Qarabağ"la "Bayer" arasında sayca üçüncü olacaq. Xatırladaq ki, bu rəqiblər turnirin pley-off mərhələsindən öncə qrupda qarşılaşıblar. Təəssüflər olsun ki, hər iki oyunda Leverkuzen təmsilçisi qalib gəlib. Bakıda keçirilən ilk oyunda 0:1 hesabla qalib gələn "Bayer" öz meydanında isə daha fərqli hesabla üstün olub - 5:1.

Atalar üçdən deyib. Ümid edirik ki, Qurban Qurbanovun yetirmələri üçüncü görüşdə qalib gələrək, atalar sözünün doğruluğunu sübut edəcəklər.

Bir məqamı da qeyd edək ki, cari mövsümdə iştirak etdiyi bütün turnirlərdə məğlubiyyətin nə olduğunu bilməyən ispaniyalı mütəxəssis Xabi Alonsanin komandası hazırda Avropanın ən güclü 5 çempionatından biri olan Almaniya Bundesliqasına vahid liderlik edir. "Bayer" Bundestaqda ən yaxın izləyicisi olan "Bavariya"ni 8 xal geridə qoyur.

Sonda, ona da ümid edək ki, matçın baş hakimi olan fransalı "dostumuz" bu oyunda "Qarabağ" üçün "Bayer"in 12-ci oyunçusuna çevrilməyəcək.

Turnirin pley-off mərhələsinin Bakıda "Braqa"ya (Portuqaliya) qarşı keçirilən cavab matçında bütün Azərbaycana unudulmaz sevinc bəxş edən Qarabağ"a uğurlarrrrrr!!!

İNTİQAM Məmmədov