Boksçumuz Nicat Hüseynov lisenziya turnirinə qələbəylə başlayıb 

Dünən İtaliyanın Busto Arsizio şəhərində boks üzrə kişi və qadınlar arasında keçirilən və Azərbaycan boksçularının da iştirak etdiyi dünya üzrə birinci Olimpiya Təsnifat Turnirinə start verilib. Yarışın ilk günündə Azərbaycan millisinin üzvü Nicat Hüseynov (51 kq) rinqə çıxaraq, mübarizəyə qatılıb. Azərbaycan Boks Federasiyasından verilən məlumata görə ikiqat Avropa çempionumuz mübarizəyə başladığı 1/32 final çərçivəsində hindistanlı boksçu, son dünya çempionatının bürünc medalçısı Deepak Deepakı sınağa çəkib. Gərgin mübarizə şəraitində keçən döyüş boksçumuzun qələbəsi ilə başa çatıb - 3:2 (29:28, 28:29, 29:28, 27:30, 29:28). Hüseynov ikinci göyüşünü martın 6-da Sahil Alahverdiviyə (Gürcüstan) qarşı keçirəcək. 

Qeyd edək ki, turnirin ikinci günündə Azərbaycan millisinin daha 2 üzvü - Ümid Rüstəmovla (57 kq) Zeynəb Rəhimova (54 kq) runqə çıxacaq. Boksçularımız start döyüşündə müvafiq olaraq, Navvaf Alzaxmi (BƏƏ) və Fatma Zöhra Xala (Əlcəzair) ilə qarşılaşacaq. 

Qeyd: Reqlamentə görə, qadınların yarışında 57, kişilərdə isə 60 kq istisna olmaqla qalan çəkilərdə 4 yarımfinalının hamısı Olimpiada-2024-ə lisenziya qazanməş olacaq. Qadınlarda 57 kq-da yalnız finalçılar (iki nəfər), kişilərdə isə 60 kq-da ilk 3 yerin sahibi lisenziya qazanacaq. 

İNTİQAM Məmmədov