Şəhriyar Məmmədyarov reytinqdə 7 pillə qalxmaqla Top-20-də yer alıb

Teymur Rəcəbovsa yerində sayıb 

FİDE (Beynəlxalq Şahmat Federasiyası) dünya şahmatçılarının mart ayının 1-ə olan reytinq cədvəlindəki vəziyyəti lərini elan edib.

Yeni cədvəl şahmatçılarımızdan Şəhriyar Məmmədyarov (2734) üçün yaxşı olub. Belə ki, o, 7 pillə irəliləməklə Top-20-yə daxil olub və 19-cu yeri tutub. Kişi şahmat yığmamızın daha bir lideri - Teymur Rəcəboca (2723) əvvəlki kimi yenə də 25-ci pillədə qərar tutub. Aktivində 2651 xalı olan Rauf Məmmədov Top-100-də 85-ci yerdədir. Daha bir öndə gedən şahmatçımız - Nicat Abbasov isə yenə də ilk yüzlükdə yer ala bilməyib. 

Kişilərin reytinq cədvəlində ilk üçlüyü yenə də müvafiq ardıcıllıqla norveçli sabiq dünya çempionu Maqnus Karlsen (2830), və amerikalı zəka sahibləri - Fabiano Karuana (2804) və Xikaru Nakamura (2789) bölüşür. 

Qadınlara gəlincə, çinli dünya çempionu Xou İfanın (2632) birinci, onun həmvətəni Tszyuy Vantszyunun (2559) ikinci, rusiyalı Aleksandra Qoryaçkinanın (2553) isə üçüncü yeri tutduğu reytinq cədvəlinin ilk yüzlüyündə yığmamızın üç üzvü yer alıb. Onlardan Günay Məmmədzadə (2449) 27-ci, Ülviyyə Fətəliyeva (2384) 67-ci, Gövhər Beydullayeva (2374) 77-ci pillədə yer alıb. Daha bir şahmatçımız, aktivində 2351 xalı olan Gülnar Məmmədova isə 102-ci pillədədir. 

İNTİQAM Məmmədov