"Qarabağ" ilk və səfər matçında "Braqa"nı məğlub edib

Dünən futbol üzrə UEFA Avropa liqasının pley-off mərhələsində ilk oyunlar keçirilib. Bu turnirdə ölkəmizi təmsil edən Azərbaycan çempionu "Qarabağ" klubu Portuqaliyanın Braqa şəhərində eyniadlı klubun qonağı olub. Cütün favoriti "Braqa" hesab edilsə də, qarşılaşma Azərbaycan çempionunun qələbəsi ilə başa çatıb. Qeyd edək ki, "Braqa Munisipal" stadionunda baş tutan və taleyi danimarkalı referi Morten Kroqa həvalə olunan qarşılaşmada qapılara üst-üstə 6 qol burulub ki, onun da dördü "Qarabağ" klubunun aktivinə yazılıb - 2:4. Oyuna ev sahibi fəal başlasa da hesabı açan "Qarabağ" olub. 21-ci dəqiqədə ağdamlıların heyətində yer alan Marko Yanukoviç dəqiq penaltı zərbəsi ilə çempionumuzu hesabda irəli çıxarıb - 0:1. İlk yarının son dəqiqəsində (44-cu dəq.) ev sahibləri Simon Bonzanın dəqiq zərbəsi ilə hesabda bərabərlik yaradıblar - 1:1. 

Matçın birinci hissəsi bu hesabla bitib.

İkinci yarıda hər iki komanda meydanda fərqli oyun nümayiş etdirib. Doğma divarlar arasında qalib gəlmək istəyən "Braqa" tez-tez hücumlara keçib. Özünü heç də qonaq kimi aparmayan "Qarabağ" rəqibi əks hücumda yaxalayaraq ard-arda rəqibin qapısına üç dəfə yol tapıb. Əvvəlcə 54-cu dəqiqədə Abdella Zubir "Qarabağ"ın ikinci qolunu vurmaqla komandasını hesabda yenidən irəli çıxarıb - 1:2. 

Matçın 65-ci dəqiqəsində Juninyo baxımlı bir qola imza ataraq hesabı bir qədər də artırıb - 1:3. Bununla da kifayətlənməyən ağdamlılar hücumları davam etdirməklə ev sahiblərinin qapısına yol tapmaqa çalışıblar. Axtarış uzun çəkməyib. 69-cu dəqiqədə Zubir dubl edərək hesabı - 1:4-ə çatdırıb.

Ev sahibləri yalnız 90+1 dəqiqədə Joau Moutinyunun penaltidən vurduğu zərbədən sonra bu qollardan birinin əvəzini çıxıblar - 2:4.

Pley-off mərhələnin cavab oyunu fevralın 22-də Bakıda Tofiq Bəhramov adına Respublika stadionunda baş tutacaq. Görüş saat 21:45-də başlanacaq. İki oyunun ümumi nəticəsinə görə qalib olan komanda turnirin 1/8 final mərhələsinə yüksələcək.

İNTİQAM Məmmədov