Yunan-Roma güləşi üzrə yığmamız AÇ-də 2-ci olub

Klassiklərimiz üçü qızıl olmaqla, 6 medal qazanıblar

Rumıniyanın paytaxtı Buxarestdə idman güləşi üzrə keçirilən və Azərbaycan yığmasının da iştirak etdiyi Avropa çempionatında dünən həlledici final və bürünc medal uğrunda baş tutan görüşlərlə yunan-Roma güləşi üzrə yarışlara yekun vurulub. Yarışın son günü də Azərbaycan komandası üçün uğurlu olub. Belə ki, son gündə üç təmsilçimiz final görüşünə çıxıb ki, onlardan da ikisi - Nihat Məmmədli (60 kq) və Həsrət Cəfərov (67 kq) həlledici görüşü də qələbə ilə başa vuraraq, Avropa çempionu adını qazanıb. Finalda Moldovalı Viktor Cebanu (8:3) üstələyən Nihat karyerasında birinci, final qarşılaşmasında rusiyalı Ruslan Bicurindən (8:5) güclü olan Həsrət isə ikinci dəfə Avropa çempionu adını qazanıb.

Təəssüflər olsun ki, daha bir finalcimiz - Ülvi Qənizadə (72 kq) isə finalda türkiyəli Selçuk Cana uduzmaqla ötənilki çempionluq titulunu qoruya bilməyib.

Qeyd edək ki, bunlardan öncə klassiklərimizdən bütün görüşlərini qələbə ilə bitirən Murad Məmmədov (63 kq) qızıl, yalnız finalda büdrəyən Rəşad Məmmədov (55 kq) gümüş, ən aqirimiz olan Beka Kandelaki (130 kq) isə bürünc medal qazanıb.

Beləliklə, 6 (3-2-1) qazanan və 142 xal toplayan Azərbaycan yığması komanda hesabında yalnız Türkiyədən (147 xal) geri qalmaqala Avropada ikinci olub və tarixi uğura imza atıb.

Yeri gəlmişkən, dünən qadın güləşçilər də mübarizəyə qatılıblar. Azərbaycan yiqmasindan İlk olaraq, 10 qat Avropa çempionu adını daşıyan Marina Stadnik (50 kq) və Alena Kolesnik (59 kq) döşək üzərinə çıxıb. Hər iki güləşçimiz uqurla çıxış edərək, finala yüksəlib. Bu gün axşam saatlarında cütlüyümüzdən Stadnik türkiyəli Evin Demirxani, Alena isə ukraynalı Alına Flippovici məqlub etməyə çalışacaq. 

İNTİQAM Məmmədov