ACB rəsmi saytında Azərbaycan cüdoçularından bəhs edib

16-18 fevral günlərində paytaxt Bakıdakı Milli Gimnastika Arenasında kişi və qadın cüdoçular arasında İJF-nın (Beynəlxalq Cüdi İtifaqı) illik təqvim planına uyğun olaraq mövsümün ikinci "Böyük Dəbilqə" turniri keçiriləcək. Bu arada Avropa Cüdo Birliyinin (ACB) rəsmi saytında bu turnirdə iştirak edəcək Azərbaycan çüdoçularından bəhs edən məqalə dərc edilib. Azərbaycan Cüdo Federasiyasından verilən məlumata görə həmin məqalədə deyilir: "Bu həftə Azərbaycan Cüdo Federasiyası dünyanın müxtəlif ölkələrindən ən yaxşı cüdo idmançılarının mübarizə aparacağı Bakı "Böyük Dəbilqə" turnirinə ev sahibliyi edir.

Azərbaycanın əsas idmançıları, o cümlədən Hidayət Heydərov, Zelim Kotsoyev və Səid Mollayi qızıl medal uğrunda mübarizə aparacaqlar. Bundan əlavə, Paris "Böyük Dəbilqə" turnirində gümüş medal qazanmış Zelim Tçkayev və Elcan Hacıyev də yarışdadır. Tçkayev 2023-cü ildə titulunu doğma meydanda qorumağa qərarlıdır.

Azərbaycanı bu turnirdə təmsil edən Yaşar Nəcəfov, -66 kq çəki dərəcəsində mübarizəyə liderlik edəcək.

Xatırladaq ki, “Dünya Cüdo Turu” seriyasına daxil olan və üç gün davam edəcək Bakı "Böyük Dəbilqə" turnirində 64 ölkədən 410 (230 kişi, 180 qadın) cüdoçu medallar uğrunda mübarizə aparacaq. Azərbaycanın isə ev sahibi olaraq yarışda 13 çəki dərəcəsində 23 kişi və 13 qadın idmançı ilə təmsil olunacaq.

Qeyd edək ki, yarışda Azərbaycan Cüdo Federasiyasının “A” kateqoriyalı beynəlxalq dərəcəli hakimi Nazim Umbayev ədalət təmsilçiləri arasında yer alacaq.

Reqlamentə əsasən turnirdə hər çəki dərəcəsində ilk üç yeri tutan cüdoçular müvafiq olaraq aktivlərinə 1000, 700 və 500 reytinq xalı yazdırmış olacaqlar.

İNTİQAM Məmmədov