"Azərreyl" "Murov"u üstələyərək liderliyini möhkəmləndirib 

Dünən qadın voleybolçulardan ibarət klubların mübarizə apardığı Azərbaycan çempionatının Yüksək Liqasında sayca 13-cü olan növbəti tur çərçivəsində bir oyun keçirilib. Bakı Voleybol Mərkəzində baş tutan həmin oyunda yarış cədvəlinə liderlik edən "Azərreyl" klubu ilə liderin ən yaxın təqibçisi olan “Murov Az Terminal” komandası qarşılaşıb. Görüş ikinicinin üstünlüyü ilə (24:26) başlasa da sonda meydanı qalib durumda tərk edən "Azərreyl" olub - 3:1 (24:26, 25:21, 26:24, 25:14).

Bu qələbədən sonra xallarının sayını 33-ə çatdıran (11 qələbə) “AzərreylL” liderliyini bir qədər də möhkəmləndirib. “Murov Az Terminal” 29 xalla (10 qələbə) 2-ci, “Abşeron” 24 xalla (8 qələbə) 3-cü, “Gəncə” 15 xalla (5 qələbə) 4-cü, “Milli Aviasiya Akademiyası” 10 xalla (3 qələbə) 5-ci, bir xalı belə olmayan UNEC isə sonuncu pillədə qalıb. .

Qeyd edək ki, turun digər oyunları fevralın 14-də və 17-də keçiriləcək. Bu gün saat 15:00-da GİN Voleybol Mərkəzində “Milli Aviasiya Akademiyası” və “Abşeron” komandaları üz-üzə gələcəklər. 3 gün sonra (17 fevralda) isə turun son qarşılaşmasıda UNEC öz meydanında “Gəncə” klubunu qəbul edəcək. Həmin oyun saat 15:00-da UNEC-in idman zalında başlayacaq.

İNTİQAM Məmmədov