"20 Yanvar...Şahidlərin xatirəsində” adlı görüş keçirilib

Binəqədi Gənclər Evinin təşkilatçılığı ilə 20 Yanvar faciəsinin 34-cü ildönümü ilə əlaqədar “20 Yanvar...Şahidlərin xatirəsində” adlı görüş keçirilib. 

Görüşdə 20 yanvar hadisələrini tarixin yaddaşına həkk edən fotomüxbir Rasim Sadıqov və 20 yanvarın canlı şahidi Nazim Ələkbərovun oğlu Məhəmmədəli Ələkbərov iştirak edib. 

Əvvəlcə Vətənimizin azadlığı və suverenliyi uğrunda canından keçən şəhidlərimizin xatirəsi bir dəqiqəlik sükutla yad edilib. Daha sonra moderator Fərəh Quliyeva qonaqlarımız haqqqında gənclərə məlumat verib. 

Anım tədbirində fotomüxbir Rasim Sadıqov faciə zamanı istifadə etdiyi fotoaparatı və yaddaşlara həkk etdiyi fotoşəkilləri gənclərimizə təqdim etdi. Daha sonra qonağımız Məhəmmədəli Ələkbərov həmin qanlı gecədə baş verənlər barədə gənclərə məlumat verib, xalqımızın başına gətirilən müsibətlərdən və Azərbaycanın azadlıq mübarizəsindən danışıb.  Məhəmmədəli bəy atasının 20 Yanvarın ilk saatlarında maşınına odun yükləyərək məhəlləsindəki bəzi gənclərlə mitinq meydanına gedərkən yolda tanklar ilə qarşılaşdığını, əzilmiş avtomobildən öz səyi ilə çıxdığını və evə qayıdanda ailəsinə yaşadığı acını danışmağa söz tapmadığını bildirib. 

Qeyd edək ki, 20 Yanvar hadisələrinin şahidi Nazim Ələkbərovun həmin gecə gördüklərindən və yaşadıqlarından bəhs olunan "Son anda" filmi çəkilib. Nazim Ələkbərov obrazı onun oğlu Məmmədəli Ələkbərova həvalə olunub, Nazim Ələkbərovun müsahibəsinə də yer verilib.

Məlumat üçün bildirək ki, N.Ələkbərov 20 Yanvar hadisələrindən sonra çəkilmiş görüntülərdəki “Zaporojets” markalı avtomobilin sahibidir. Həmin gecə 37-22 AQ nömrə nişanlı maşının üzərindən PDM (piyadaların döyüş maşını) keçib, lakin N.Ələkbərov son anda onun içindən sağ-salamat çıxa bilib. Film məhz bu səbəbdən “Son anda” adlanır. Nazim Ələkbərov avtomobili bu günə kimi saxlayıb.

Xatırladaq ki, 1990-cı il yanvarın 19-dan 20-nə keçən gecə, saat 23:30 radələrində keçmiş Sovet İttifaqının müxtəlif təyinatlı qoşun hissələri fövqəladə vəziyyət elan etmədən qəflətən Bakı şəhərinə yeridilərək, küçə və meydanlarda toplaşan dinc əhaliyə amansızcasına divan tutmağa başlamışdır. Beləliklə, qoşunların qanunsuz yeridilməsi nəticəsində Bakıda və respublika rayonlarında 131 nəfər öldürülmüş, 744 nəfər yaralanmış, 841 nəfər qanunsuz həbs olunmuşdur. hərbi qulluqçular tərəfindən 200 ev və mənzil, 80 avtomaşın, o cümlədən təcili yardım maşınları, yandırıcı güllələrin törətdiyi yanğın nəticəsində dövlət əmlakı və şəxsi əmlak məhv edilmişdir.