Son gün, son şans və puça çıxan son ümid 

İbrahim Həsənov Dünya Birinciliyində ikinci oldu 

İyulun 27-də 17 yaşlılar (U-17) arasında startı verilən və  60-dan çox ölkəni təmsil edən 700-dək idmançının mübarizəyə qatılan və Azərbaycanın ev sahibliyi etdiyi idman güləşi üzrə Dünya Birinciliyinə nəhayət ki, avqustun 2-də sərbəst güləşçilər son həlledici final görüşləri ilə yekun vurulub. Qeyd edək ki, yarışı birbaşa canlı izləmək üçün Milli Gimnastika Arenasına toplaşan minlərlə yerli güləş azarkeşinin son gündə son ümid yeri 51 kq çəki dərəcəsində final görüşünə çıxan İbrahim Həsənov idi. Nəhayət ki, hamının gözlədiyi zaman gəldi. Təəssüflər olsun ki, güləşçimiz ona ollan son ümidi və etimadı doğrultmadı. İranlı Bünyamin Cəfərlə görüşə çıxan azərbaycanlı güləşçi qələbə qazana bilmədi. Görüşün 2 dəqiqəlik birinci hissəsində rəqiblərdən heç biri xal qazana bilmədi. Qeyd edək ki, birinci hissədə azacıq üstünlüyü hiss edilən iranlı güləşçi ikinci hissədə sözün əsil mənasında xalça üzərində "at oynatmağa" başladı və görüşü 5:1 hesablı qələbə ilə başa burdu. 

Beləliklə də, azərbaycanlı güləş həvəskarlarının son günə qalan son ümidi də puça çıxdı. Azərbaycanın ev sahibliyi etdiyi Dünya Birinciliyində mübarizəyə qatılan 10 sərbəst güləşçimizdən yalnız biri mükafatçılar sırasında yer ala bildi.

Xatırladaq ki, birinciliyin ilk üç günündə yunan-Roma üzrə U-17 millimiz üçü gümüş, üçü isə bürünc əyarlı olmaqla 6 medal qazanmışdılar.

Ümumilikdə, Azərbaycan ev sahibliyi etdiyi Dünya Birinciliyini qızıl medal olmadan 7 (0-4-3) medalla başa vurdu. 

İNTİQAM Məmmədov