“Ana dilimizi qoruyaq” – Masallıda tədbir

Masallıda  1 Avqust – Azərbaycan Əlifbası və Azərbaycan Dili Gününə həsr olunmuş "Ana dilimizi qoruyaq" adlı tədbir keçirilib.
İyulun 31-də, Masallı Rayon Mərkəzləşdirilmiş Kitabxana Sistemi, Tarix-Diyarşünaslıq Muzeyi və Azərbaycan Jurnalistlər Birliyinin (AJB) Masallı rayon təşkilatının birgə təşkilatçılığı ilə keçirilən tədbirdən əvvəl Vətənimizin azadlığı və ərazi bütövlüyü uğrunda canlarını fəda etmiş şəhidlərin əziz xatirəsi bir dəqiqəlik sükutla yad olunub.
Tədbiri giriş sözü ilə açan Masallı Rayon Mərkəzləşdirilmiş Kitabxana Sisteminin direktoru Zamin Məmmədov çıxışında Azərbaycan Əlifbası və Azərbaycan Dili Gününün milli-mənəvi dəyərlərimizin qorunması və təbliği baxımından xüsusi əhəmiyyət daşıdığını bildirib. O qeyd edib ki, ana dili xalqın milli kimliyini, müstəqilliyini və mənəvi dəyərlərini yaşadan ən mühüm amillərdən biridir.
Tarix-Diyarşünaslıq Muzeyinin kiçik elmi işçisi Nazənin Heydərzadə məruzəsində Azərbaycan dilinin tarixi inkişaf yolu, zənginliyi və saflığının qorunmasının vacibliyindən bəhs edib.
Azərbaycan Jurnalistlər Birliyinin Masallı rayon təşkilatının sədri Akif Ağayev qeyd edib ki, qloballaşmanın sürətləndiyi müasir dövrdə dilimizin zənginliyini və saflığını qorumaq üçün yeni anlayışlara Azərbaycan dilində uğurlu qarşılıqlar yaradılması vacibdir. Onun sözlərinə görə, bu sözlərin məktəblərdə, kütləvi informasiya vasitələrində və sosial şəbəkələrdə geniş tətbiqi təmin edilməlidir. Akif Ağayev vurğulayıb ki, hər bir vətəndaş gündəlik ünsiyyətində ana dilinin zəngin ifadə imkanlarından daha səmərəli istifadə etməyə çalışmalı, dilimizin inkişafına öz töhfəsini verməlidir.
AJB üzvlərindən – yazıçı-publisist, jurnalist-araşdırmaçı Xodaşirin Cəbiyev, Masallı Dövlət Regional Kollecinin müəllimi Nazim Əliyev, Tarix-Diyarşünaslıq Muzeyinin direktoru Əntiqə Tağıyeva, AYB üzvlərindən – şair-publisist Sübhan Abasbəyli, şair Meysaba Aslanova, eləcə də yazıçı-publisist Dilşad Nüsrətqızı, gənc yazar Nurlan Hüseynzadə çıxışlarında ana dilimizin saflığının qorunmasının hər bir vətəndaşın mənəvi borcu olduğunu, doğma dilə sevgi və hörmət hissinin gənc nəslə aşılanmasının vacibliyini vurğulayıblar. 
Geniş fikir mübadiləsi şəraitində davam edən tədbirdə şair Sübhan Abasbəyli və kitabxananın daimi oxucusu Jalə Əzizova ana dilinə həsr olunmuş şeirlər səsləndiriblər. 

Akif VAQİFOĞLU