Ağcabədidə kənd təsərrüfatının inkişafı ilə bağlı toplantı keçirilib

İyunun 5-də Ağcabədi Rayon İcra Hakimiyyətində Azərbaycan Respublikasının Prezidenti İlham Əliyevin mayın 25-də “Kənd təsərrüfatının inkişafına dair Dövlət Proqramının qəbulu” ilə bağlı keçirilmiş müşavirədə verdiyi tapşırıqların icrası məqsədilə toplantı keçirilib.

AZpress.AZ-ın bölgə müxbiri xəbər verir ki, toplantıda Ağcabədi Rayon İcra Hakimiyyətinin başçısı Rafil Hüseynov, icra hakimiyyəti başçısının müavinləri, sahibkarlar, iş adamları və təsərrüfatçılar iştirak ediblər.

Tədbirdə çıxış edən rayon icra hakimiyyətinin başçısı Rafil Hüseynov Ağcabədinin aqrar rayon kimi iqtisadi potensialından, kənd təsərrüfatı sahəsində əldə olunan nailiyyətlərdən və həyata keçirilən tədbirlərdən ətraflı bəhs edib. O, həmçinin aqrar sektorun daha da inkişaf etdirilməsi istiqamətində sahibkarlara və təsərrüfatçılara müvafiq tövsiyə və tapşırıqlarını çatdırıb.

Fermerlər və iş adamları ilə diskussiya formatında keçirilən görüş zamanı kənd təsərrüfatının inkişafı ilə bağlı bir sıra təkliflər səsləndirilib. “AzərŞəkər” MMC-nin İdarə Heyəti sədrinin müavini Vüqar Ağayev, “Ağcabədi Taxıl” MMC-nin rəhbəri Etibar Kərimov, sahibkarlar Mülhazi Balakişiyev və Anar Quliyev tərəfindən irəli sürülən təkliflər geniş müzakirə olunaraq təhlil edilib.