Tahir Süleymanov:

 Azərbaycan futbolunda özünə dərin yer etmiş tendensiya hökm sürür

Klubların çıxışında, nəticələrin qazanılmasında futbol adına strateji planlaşdırma, heyətin formalaşdırılması ilə yanaşı təlim-məşq toplanışları, hazırlıq prosesi mühüm əhəmiyyət kəsb edir. Yay və qış planları fərqlidir. Fasilə dönəmi çox spesifikdir. Bir tərəfdən, mövsümöncəsi işlərin necə qurulduğunun göstəricisidirsə, digər tərəfdən, qışda heyətə müəyyən korrektələr edilir, finişə doğru hərtərəfli güc toplanılır...

Azərbaycan futbolunda özünə dərin yer etmiş, kök salmış tendensiya hökm sürür: - "Yemək-içməkləri, geyimləri, formaları yerində, otelləri, rahat yolçuluqları təmin edilir, maaş/mükafatları artıqlaması ilə ödənilir, bundan artıq nə edilməlidir, çıxıb futbollarını oynasınlar". Kənardan belə fikirlərin səsləndirilməsi başadüşüləndir, bəla ondadır ki, belə absurd, diletant, ən yaxşı halda həvəskar səviyyəsində fikirlər ümumi futbol, klub idarəçiləri səviyyəsində bildirilir.

Böyük futbolda uğurlu sistemin qurulması, nəticələrin təmin edilməsi tək maddi şəraitin yaradılmasından asılı deyil. Peşəkar futbolda xırdalıq olmur, hər bir görüləcək iş, atılacaq addım zərgər dəqiqliyi ilə hesablanmalıdır.

Klub təfəkküründə futbol anlayışı olmayanda, məşqçi/futbolçular əziyyət çəkirlər. Əsasən də yerli baş məşqçilər dayaqsız qalır, əcnəbilər isə milyonlarını qazanıb aradan çıxırlar...

Klub rəhbərliyi və məşqçilər korpusu arasında futbola söykənən fikir, ideya birliyinin olması, yaradılması şərtdir! Futbolçulara kimi gedib çıxan zəncirvari dalğa qırılmamalı, möhkəm olmalıdır. Müasir futbolun tələblərinə cavab verən futbol fəlsəfəsi ilə birgə, idarəçi heyət, bu sahənin incəliklərini bilməklə paralel, dərk etməlidir - mərkəzdə hər zaman məşqçi/ futbolçular olur! Klub adına görülən digər işlərin hamısı köməkçi faktorlardır.

Artıq Antalya Azərbaycan klubları üçün doğma məkana çevrilib. İstənilən infrastruktur mövcuddur. Belə şəraitdə klub adına atılan addımlar, futbol yaradıcılığı ön plana çıxır. Qonşu ölkəyə yeyib-içməyə gedilmir/gedilməməlidir! Bunun üçün futbol sistemini bilmək, klub/komandanın vahid orqanizmə çevrilməsi mütləqdir!

Qış hazırlıq dönəmində 5 mövsüm ardıcıl "Neftçi"nin Antalya toplanışlarına rəhbərlik etdik. Fasilədə vaxt imkanı olanda, ağır fiziki yükləmələr fonunda, futbolçulara psixoloji təsir etməsin, monotonluq olmasın deyə, ikinci mərhələ hazırlıq üçün, yerində otel dəyişməsini də edirdik. Əsasən isə, bu illər ərzində bir bazada məskunlaşmışıq...

"Mardan Sport Kompleks"də daimi olaraq iki klub - "Neftçi" və Luçeskonun "Şaxtyor"u məskunlaşırdı. Futbolu düşünənlər, kənar amillərə fikir verməyənlər üçün ideal idman kompleksi idi. Geniş otaqlar, idman/futbola aid hər bir şərait, iki stadion, əlavə 2-3 yardımçı məşq meydançaları, qapalı, şəhərdən kənar, turistlərin, əyləncənin olmadığı məkan.

Öncədən müqavilə ilə təsdiq edilən iki stadion daimi olaraq "Şaxtyor" və "Neftçi"inin ixtiyarına verilirdi. Bizdən başqa heç kim orada məşq edə bilməzdi. Digər komandalar yardımçı meydanlarda hazırlaşırdılar. Bu, əvvəldən incəliyinə kimi hesablanmış klub nüfuzunun göstəricisi idi. Mətbəxdə bişirilən yeməklər gündəlik sifarişimizlə, həkimlərimizin nəzarəti ilə həyata keçirilir, futbolçuların məşq paltarları inzibati heyətin tapşırıqlarına uyğun, gün ərzində 2-3 dəfə yuyulur, yenilənirdi...

Futbolu düşünməyənlər üçün darıxdırıcı məkan idi. Bir çox komandalar fantastik şəraiti olan idman kompleksindən qaçır, az sayda müxtəlif komandalar isə hər dəfə gəlir, dəyişirdilər... "Neftçi" və "Şaxtyor"dan başqa... Bizim darıxmağa vaxtımız yox idi... Qiymətlər də sərfəli idi, digər otellərdən ucuz başa gəlirdi.

Futbolçular məşqə çıxanda sevinirdilər. Məşqçi/futbolçular səhərdən axşama kimi bizi yanlarında görürdülər, bütün məsələr operativ həll edilirdi. Hər kəs dərk edirdi, klub rəhbərliyi onlarla bir yerdə əziyyət çəkir, görülən işlər, qoyulan məhdudiyyətlər komandanın xeyiri üçün edilir.

Hazırlıq dönəmində hər saatın, istirahətin futbolçuların bərpasında əvəzolunmaz önəmi var. Müqavilə şərtlərimizdən biri, yoxlama görüşlərini "ev"də oynamağımız idi. 1-2 saat səfər yolçuluğu əvəzinə, futbolçularımız ağır məşqlərdən sonra daha çox istirahət vaxtı qazanırdılar. Bərpa ilə yanaşı, bu, oyunçuların yorğunluq fonunda zədələnmələrinin də qarşısını xeyli alırdı...

Rəqib seçiminə xüsusi önəm verilirdi. Böyük klublar, dərk edilirsə, öz imiclərini qorumaq məcburiyyətindədirlər. Ancaq öz ölkələrinin yüksək liqa təmsilçiləri və imkan daxilində adlı-sanlı klublarla qarşılaşırdıq. Riskli addımlar olsa da, görülən işlərin keyfiyyəti belə oyunlarda bilinir və əlavə olaraq futbolçularda mötivasiyanı artırır, "Neftçi"nin hansı çəkiyə malik olduğu əyani olaraq dərk edilir, göstərilir, Azərbaycanda və digər ölkələrdə ictimai, media diqqəti mərkəzində olur. Klubda çalışdığımız dönəmdə Antalyada, "Mardan Sport"a son oyunlarımızdan biri "Fənərbaxça" ilə bərabərlik qarşılaşması oldu...

Təbii ki, ardıcıllığın təmin olunması şərti ilə, öncə komanda öz oyun fəlsəfəsinə uyğun yerli/legioner futbolçulardan ibarət düzgün və balanslı halda heyətin formalaşdırılmasıdır. Bütün bunlar böyük iş həcmi, əziyyət tələb edir. Futbolun incəlikləri ilə bağlı, kənardan xırda görünən/görünməyən detallar barədə çox danışmaq olar...

Futbol elmini bilmədən, klub mənafeyi, azarkeş ordusu düşünülmədən bunların həyata keçirilməsi mümkünsüzdür. Belə ağır hazırlıq dövrü və səviyyəli rəqiblərlə yoxlama oyunlarından sonra ölkə çempionatında qələbələrin qazanılması nisbətən asanlaşır, komandanın özünəinamı artır, nəticələr özünü çox gözlətmir.

Bir həftədən sonra çempionatın davamına start veriləcək. Fasilədə komandaların necə hazırlaşdığını, sabit oyun sərgiləməklərini, qazanılacaq nəticələrin dərəcəsini futbol ictimaiyyəti, jurnalistlər, azarkeşlər əyani olaraq görəcəklər. Əsas isə, finişdən sonra çempionatdakı yerlərə uyğun avrokuboklara hazırlıq, komandaların adlarına uyğun nəticələrin göstərilməsidir.