Bakıda "Baku Open 2026" şahmat festivalı başlayıb

Azərbaycanın paytaxtında "Baku Open 2026" Beynəlxalq Şahmat Festivalının açılış mərasimi keçirilib.

Tədbirdə gənclər və idman naziri Fərid Qayıbov, Milli Olimpiya Komitəsinin vitse-prezidenti Çingiz Hüseynzadə, Azərbaycan Şahmat Federasiyasının prezidenti Mahir Məmmədov və digər rəsmi şəxslər iştirak ediblər.

Mahir Məmmədov qeyd etdi: “Bu festival 2023-cü ildən bəri böyük bir ənənəyə çevrilib. Bütün şahmat həvəskarlarını bu tədbir münasibətilə təbrik edirəm. Turnirdə müxtəlif yaş qruplarından olan oyunçular iştirak edir və iştirakçıların sayı rekord həddə çatıb. Hər kəsə ədalətli mübarizə və qələbələr arzulayıram.”

Fərid Qayıbov vurğuladı: “Azərbaycanda şahmat ənənələri çox güclüdür. Bu idman növündə əhəmiyyətli nailiyyətlərimiz var. Şahmat Federasiyası onu inkişaf etdirmək və təbliğ etmək üçün mühüm işlər görür. Hər kəsi bu idman tədbiri münasibətilə təbrik edirəm və iştirakçılara uğurlar arzulayıram.”

Qeyd etmək lazımdır ki, yarışda 10 ölkədən 900-dən çox şahmatçı iştirak edir və mükafat fondu 50.000 dollardır. İştirakçılar arasında keçmiş dünya çempionu Ruslan Ponomariov, dünya sürətli şahmat çempionu Daniil Dubov, Avropa çempionatının medalçısı Nicat Abasov və 14 yaşlı Avropa çempionu Xaqan Əhməd var.