"Turan" VK Azərbaycan çempionu olub

Aprelin 19-da qadın voleybol klublarının mübarizə apardığı Azərbaycan çempionatının Yüksək Liqasında baş tutan həlledici final və üçüncü yer uğrundakı görüşlə 2025/2026-ci il mövsümünə yekun vurulub. Hər iki oyun Bakı Voleybol Mərkəzində keçirilib. Əvvəlcə bürünc medalın sahibini müəyyənləşdirmək üçün meydana "Gəncə" ilə "Milli Aviasiya Akademiyası" klubu çıxıb. Görüş "Gəncə" klubunun quru hesablı qələbəsi ilə bitib - 3:0 (25:18, 25:21, 25:21).

Ardından "Turan"la (Tovuz) "DH Volley" (Bakı) arasında həlledici final matçı keçirilib. Oyun gözlənildiyi kimi olduqca maraqlı və gərgin mübarizə şəraitində keçib. Matçın ilk seti "DH Volley"in üstünlüyü (15:25) ilə  keçsə də sonda çempionluğa yüksələn və qələbəyə sevinən "Turan" olub - 3:1.

Qeyd edək ki, ikinci setdə təşəbbüsü ələ alan və seti öz xeyrinə (25:21) başa vuran Tovuz təmsilçisi hesabı bərabərləsdirib - 1:1. Təşəbbüsü əldən verməyən "Turan" üçüncü seti də üstün durumda (25:19) bitirməklə, ümumi hesabı öz xeyrinə dəyişib - 2:1. Oyunda daha gərgin keçən 4-cu set həlledici olub. Set boyu gah "Turan", gah da "DH Volley" 2- 3 xal fərqiylə önə çıxsa da (7:4, 10:13) sonra setdə mübarizə xala-xal prinsipi ilə davam edib (14:14, 15:15, 16:16, 17:17, 18:18). Yenidən fərq "DH Volley "in xeyrinə olmaqla 3-ə çatıb (18:21) və yenə də xala-xal prinsipi davam edib (21:21, 22:22, 23:23). Bundan sonra isə "Turan" ardıcıl 2 xal qazanmaqla seti udub - 25:23. Bununla da dramatik final oyunu başa çatıb.

Final matçından sonra mükafatlandırma mərasimi keçirilib. Qalib və mükafatçılar layiq olduqları medallarla, eləsə də müxtəlif nominasiyalar üzrə fərqlənən oyunçular təltif olunublar.

İNTİQAM Məmmədov