“Rayonlarda şəhərsalma mədəniyyəti: tarixi yanaşma” – Masallıda tədbir

Masallıda “Şəhərsalma və Memarlıq İli”inə həsr olunmuş “Rayonlarda şəhərsalma mədəniyyəti: tarixi yanaşma” mövzusunda tədbir keçirilib.
Rayon İcra Hakimiyyəti və Mərkəzi Kitabxana Sisteminin birgə təşkilatçılığı ilə tarix-diyarşünaslıq muzeyində gerçəkləşən tədbirdə təşkilatçı qurumların əməkdaşları, müəllimlər və media nümayəndələri iştirak ediblər. 
Əvvəlcə Ulu Öndər Heydər Əliyevin və Azərbaycanın müstəqilliyi uğrunda şəhid olan Vətən övladlarının xatirəsi bir dəqiqəlik sükutla yad olunub.
Tədbirin məqsədi barədə məlumat verən muzeyin direktoru, Əməkdar mədəniyyət işçisi Əntiqə Tağıyeva şəhərsalma mədəniyyətinin tarixi yaddaşımızın və mədəni irsimizin qorunmasında mühüm rolundan danışıb.
Lənkəran-Astara Regional Mədəniyyət İdarəsinin rayon üzrə nümayəndəsi Salman Yunusov bildirib ki, qədim yaşayış məskənləri təbii-coğrafi şəraitə uyğun şəkildə formalaşıb və ictimai məkanlarla yaşayış sahələri arasında ahəng qorunub. Onun sözlərinə görə, müasir şəhərsalmanın əsas vəzifələrindən biri bu tarixi irsi qorumaq və gələcək nəsillərə çatdırmaqdır.
Masallı Rayon İcra Hakimiyyəti aparatının baş məsləhətçisi Nuranə Muradova qeyd edib ki, Prezident İlham Əliyevin 2026-cı ili “Şəhərsalma və Memarlıq İli” elan etməsi ölkədə memarlıq irsinin qorunmasına və şəhərlərin planlı inkişafına verilən önəmin göstəricisidir.
Azərbaycan Jurnalistlər Birliyi rayon təşkilatının sədri, “Yeni həyat” qəzetinin əməkdaşı Akif Ağayev, mərkəzi kitabxananın müdiri Zamin Məmmədov şəhərsalmanın yalnız tikinti deyil, həm də cəmiyyətin mədəni inkişafını əks etdirən vacib sahə olduğunu vurğulayıblar. Bildirilib ki, rayonların inkişafı ilə yanaşı, onların tarixini və ruhunu yaşadan memarlıq irsinin qorunması hər birimizin ümumi məsuliyyətidir.

Akif VAQİFOĞLU