Yeniyetmə boksçuların Azərbaycan birinciliyinə start verilib

Bu gün Boks Mərkəzində yeniyetmə boksçular arasında seçmə xarakterli Azərbaycan birincilyinə start verilib. Yanvarın 14-dək davam edəcək birincilikdə 74 idman kollektivini təmsil edən 408 idmançı medallar uğrunda 14 müxtəlif çəki dərəcəsində mübarizə aparacaq. Yeri gəlmişkən, iştirakçıların sayına görə, bu birincilik yeni rekord kimi tarixə düşüb. Belə ki, ötən il təşkil edilən analoji yarışda 66 kolektivdən 326 boksçu iştirak etmişdi. 

Xatırladaq ki, döyüşlərə start verməzdən öncə, iştirakçı komandaların paradı olub. Bunun ardından isə, Azərbaycan Boks Federasiyasının prezidentinin müsaviri Samir Hüseynov çıxış edib. "Olimpiya ili çərçivəsində ilk yerli yarışdır və Paris-2024 Yay Olimpiya Oyunlarında boksçularımıza böyük ümidlər bəslənilir. Bu gün yeniyetmələr arasında Azərbaycan birinciliyində iştirakçıların sayına görə, yeni rekord vurulub. Bu, çox sevindiricidir. Yarışların ədalətli keçirilməsi, regionlarda da infrastrukturun qurulmasının nəticələrini artıq görürük. Bundan sonra da həm Bakıda, həm də bölgələrdə boksun daha da inkişafı və kütləviləşməsi üçün ciddi addımlar atılacaq” - Samir Hüseynov belə deyib.

Azərbaycan Boks Federasiyasından verilən məlumata görə, açılış mərasimində Gənclər və İdman Nazirliyinin nümayəndəsi Əlniyaz Mirzəyev və birinciliyin supervayzeri Sergey Keman da çıxış edib və idmançılara uğurlar arzulayıb.Yarışın baş hakimi Anar Babanlıdır. 

Reqlamentə görə, hər çəkidə ilk üç yeri tutan boksçular ölkə yığmasının heyətinə cəlb ediləcək. 

Birinciliyə yanvarın 14-də həlledici final döyüşləri ilə yekun vurulacaq. 

İNTİQAM Məmmədov