"Qarabağ" evdə "Ayntraxt" klubun əzərək ÇL-da pley-offa biraz da yaxınlaşıb 

Dünən futbol üzrə UEFA Çempionlar Liqasında keçirilən daha 9 oyunla 7-ci tura yekun vurulub. Ölkəmizi bu turnirdə təmsil edən "Qarabağ"  evdə Almaniyanın "Ayntraxt" (Frankfurt-na-Mayne) klubunu qəbul edib. Tofiq Bəhramov adına respublika stadionunda baş tutan və taleyi  isveçrəli referi Sandro Şererə həvalə edilən və gərginliyi ilə nəfəslər kəsən bu oyun Azərbaycan çempionunun qələbəsi ilə başa çatıb - 3:2. 

Qeyd edək ki, çempionumuz üçün mühüm əhəmiyyət kəsb etdiyi üçün finala bərabər olan bu oyunda hakim haqsızlığina baxmayaraq, ilk və son qol, eləcə də qələbə sevincini yaşayan "Qarabağ" olub. Matçın 4-cu dəqiqəsində Kamilo Duran erkən qol vuraraq, çempionumuzu hesabda irəli çıxarıb - 1:0. Təəssüflər olsun ki, çempionumuzun bu qol sevinci çox çəkməyib. 10-cu dəqiqədə qonaq komandanın oyunçusu Can Uzun bərabərlik qolunu vurub - 1:1. İlk yarı bu hesabla bitib. 

78-ci dəqiqədə hakimin haqsızlığından "Qarabağ"ın qapısına penaltı təyin edilib. Matçın 71-ci dəqiqəsində əvəzləmə ilə meydana girən Feres Şaybi fürsəti qaçırmadan komandasını hesabda irəli çıxarıb - 1:2. Məqlubiyyətlə barışmaq istəməyən çempionumuz bundan sonra meydanda fəallığı daha da artırıb. 80-ci dəqiqədə Duran özünün və komandasının ikinci qolunu vuraraq, hesabda bərabərlik yaradıb -2:2. Matçı qələbə ilə başa vurmaq istəyindən qalmayan "Qarabağ" sonadək mübarizə apararaq, istəyinə Nail olub. 90+4 dəqiqədə ( matçın son saniyələrində) yaranmış vəziyyətdən ustalıqla istifadə edən müdafiəçimiz Bəhlul Mustafazadə komandasına hava və su kimi lazım olan qola imza atıb - 3:2. Bununla da Azərbaycan çempionu həm turnir cədvəlindəki vəziyyətini yaxşılaşdıraraq pley-offa çıxmaq şansını artırıb, həm də 2023-cu ildə Avropa Liqasında bu komandaya iki dəfə (1:2, 0:2) uduzduğunun əvəzini çıxıb. Bu qələbədən sonra aktivindəki xalların sayını 10-a çatdıran "Qarabağ" yarış cədvəlində 36 komanda arasında 25-ci yerdən 18-ci pilləyə yüksəlib. 

Yeri gəlmişkən, çempionumuz eyni xala malik olan "Qalatasaray"la (17-ci yer) qonşu olub. 

Turun və günün digər oyunlarında aşağıdakı nəticələr qeydə alınıb:

"Qalatasaray" - "Atletiko" - 1:1;

"Slaviya" (Pr) - "Barselona" - 2:4;

"Atalanta" - "Atletik" - 2:3;

"Yuventus" - "Benfika" - 2:0;

"Çelsi" - "PAFOS" - 1:0;

"Nyukasl" - "PSV" - 3:0;

"Bavariya" - "Yunion" - 2:0;

"Marsel" - "Liverpul" - 0:3.

Geridə qalan 7 turdan sonra komandaların turnir cədvəlində vəziyyət belədir:

1. Arsenal - 21 xal, 2. Bavariya - 18 xal, 3. Real - 15, 4. Liverpul - 15, 5. Tottenhem - 14, 6. PSJ - 13, 7. Çelsi - 13, 8. Mançester Siti" - 13 xal.

9. Sportinq - 13 xal, 10. Atletiko - 13, 11. Barselona - 13, 12. Atalanta - 13, 13. Nyukasl - 13, 14. Inter - 12, 15. Yuventus - 12, 16. Borussiya (D) - 11, 17. Qalatasaray - 10, 18. Qarabağ - 10, 19. Marsel - 9, 20. Bayer - 9, 21. Monako - 9, 22. PSV - 8, 23. Olimpiakos - 8, 24. Kopenhagen - 8. 

25. Napoli - 8, 26. Atletik - 8, 27. Brugge - 7, 28. Benfika - 6, 29. Bude-Qlimt - 6, 30. PAFOS - 6, 31. Yunion - 6, 32. Ayaks - 6, 33. Ayntraxt - 4, 34. Slaviya Pr - 3, 35. Vilyarreal - 1, 36. Kayrat - 1.

Qeyd: Reqlamentə görə, 8 turdan sonra yarış cədvəlində ilk 8 yeri tutan klub birbaşa 1/8 finala yüksələcək.

9-24-cü yerləri tutan komandalar pley-offda qarşılaşacaqlar. Cütün qalibləri 1/8 finala yüksələcək.

25-36-cı yerin sahibləri isə Çempionlar Liqası ilə vidalaşacaq.

İNTİQAM Məmmədov