Daha bir güləşçimiz mundialda üçüncü olub

Sərbəst güləş üzrə U-23 millimiz bir dəst medalla  dünyada dördüncü yeri tutub 

Serbiyanın Novi Sad şəhərində 23 yaşlı (U-23)  gənclər arasında idman güləşi üzrə keçirilən və Azərbaycan yığmasının da iştirak etdiyi dünya çempionatına oktyabrın 27-də son həlledici görüşlərlə yekun vurulub. Mundialın son günü iki təmsilçimiz döşək üzərinə çıxaraq bürünc medal uğrunda təsəlliverici görüşlərə qatılıb. Cütlüyümüzdən biri- 86 kq çəki dərəcəsində döşək üzərinə çıxan Ali Tsokayev daha inamla güləşərək dünya üçüncüsü olub və bürünc medala sahib çıxıb. O, əvvəlcə İtaliya təmsilçisi Qabriele Nikkoliniyə (11:0), ardından isə gürcü güləşçi Tomika Samxadzeyə (13:2) qalib gəlib.

Təəssüflər olsun ki,  son gündə döşək üzərinə çıxan digər təmsilçimiz - Ayxan Abdullazadə (65 kq) isə çıxışını bürünc medalın bir addımlığında başa vurub. Qeyd edək ki,  əvvəlcə Ukrayna təmsilçisi Nikita Qoncarovu (4:1) üstələyən Ayxan bürünc medal uğrunda son həlledici görüşdə Qirqizistan idmançısı Bilal Şərif Uulyanin (0:10) qarşısında tab gətirməyib.

Beləliklə də sərbəst güləş üzrə U-23 millimiz mundialda bir dəst medal (1-1-1) və 84 xalla komanda hesabında dördüncü olub. Millimiz ilk üçlüyü tamamlayan Yaponiyadan cəmi bir xal geri qalıb. Mundialda birinci yeri ABŞ (137 xal), ikinci yerisə İran (127 xal) tutub.

Xatırladaq ki, millimizin aktivinə yazılan qızıl medalı Kənan Heybətov (70 kq), gümüşü isə Xetaq Karsanov (125 kq) qazanıb. 

İNTİQAM Məmmədov