Masallı UGİŞM yetirməsinin III MDB Oyunlarında ilk qələbəsi

III MDB Oyunlarında Azərbaycanı təmsil edən 17 yaşadək oğlanlardan ibarət voleybol komandasının kapitanı, hücumçu Həsən Tağızadə Masallı Rayon Uşaq-Gənclər İdman-Şahmat Məktəbinin yetirməsidir.
Qeyd edək ki, ölkə yığmasının 17 yaşlı üzvü Həsən Fədail oğlu Tağızadə Masallı rayonunun Türkoba kəndindəndir. Onun idmana gəlişində və peşəkar səviyyədə inkişafında Masallı UGİŞM-in məşqçi-müəllimləri, Azərbaycan Respublikasının Əməkdar məşqçisi Sufəddin Məmmədovun və Maşalla Cahangirovun əməyini xüsusi qeyd etmək lazımdır.
Sevindirici haldır ki, millimiz III MDB Oyunlarına qalibiyyətlə başlayıb. Sentyabrın 30-da, Gəncə İdman Sarayında Qırğızıstanla qarşılaşan yığmamız 3:0 hesabı ilə qələbə qazanıb.
Məlumat üçün bildirək ki, “A” qrupunda mübarizə aparan Azərbaycan millisi oktyabrın 2-də (saat 18:30) Özbəkistan, oktyabrın 4-də (saat 18:30) Rusiya, oktyabrın 6-da (saat 19:00) Belarus komandası ilə görüşəcək. 
Azərbaycan yığması bu mötəbər turnirdə uğurla çıxış edərək ölkəmizi layiqincə təmsil etməyə çalışır. İlk qələbə, xüsusən də Masallı UGİŞM-nin uğurlu yetirməsi Həsən Tağızadənin parlaq oyunu fonunda, gənc idmançılarımızın gələcəyinə olan inamı daha da artırır.
Komandamıza növbəti oyunlarda uğurlar arzulayırıq!

Akif AĞAYEV