Bir müəllimin rəssam qəlbi-rənglərlə öyrədən yaradıcı ruh

Fırçası ilə kətanlara həyat verən, dərsliklərə isə rəngli düşüncələr köçürən bir sənətkarın hekayəsidir bu... Həm yaradıcı, həm də pedaqoq kimi Təranə Əhmədovanın həyatı, incəsənətin biliklə necə harmoniya yaratdığının ən bariz nümunəsidir. Onun üçün hər bir dərs, şagirdlərinin qəlbinə toxunan bir rəsm, təlim və sənət isə bir-birini tamamlayan iki sevgidir desək, yanılmarıq. 
Kiçik yaşlarından rənglərlə danışan, boyaların dilindən anlayan Əhmədova Təranə Cahid qızı 10 fevral 1986-cı ildə Bakı şəhərində anadan olmuşdur. O, 1993-cü ildə 246 nömrəli məktəb-liseyə qədəm qoymuş, 2003-cü ildə sözügedən məktəbin məzunu olmuşdur.  Rəssam olmağı qəlbən arzu edən gənc xanım Azərbaycan Dövlət Pedaqoji Universitetə “Təsviri incəsənət müəllimliyi” ixtisası üzrə yüksək nəticələrlə qəbul olur. Universitet illərində rəssamlığın texniki incəliklərini mənimsəyən Təranə xanım, yaradıcılığında müxtəlif üsullardan istifadə etməklə özünəməxsus üslubunu formalaşdırdını deyə bilərik. Gənc rəssam yaradıcılığı boyunca daim müxtəlif texnikalarda əsərlər yaratmağa üstünlük verib. Onun diplom işi olan "Azərbaycan – doğma diyar" adlı kətan üzərində yağlı boya ilə təsvir etdiyi tablosu təkcə rəssamlıq baxımından deyil, ideya zənginliyi ilə də diqqətləri öz üzərinə çəkməyi bacardı. Bu əsərdə milli simvollarımız – üçrəngli bayrağımızın fonunda qədim qaya təsvirləri, Azərbaycanın tarixi abidələri, xalq çalğı alətləri və milli geyimdə olan gənclərimizi rəssam bir araya gətirərək uğurlu kompozisiya ərsəyə gətirmişdir. Tanınmış rəssam Rais Rəsulzadənin "Bu qızın fırçasında vətən sevgisi var" dediyi o an, taleyinin rəngləri də dəyişdi. Əməkdar rəssamımız həmin əsəri yüksək dəyərləndirərək rəy verdi. "Azərbaycan – doğma diyar" adlı tablo Təranə xanımın yaradıcılıq dünyasının manifestinə çevrildi.
Rəssamın pedaqoji fəaliyyəti ilk olaraq Laçın rayonundakı Mehman Səfərov adına məktəbdə başladı. Hazırda isə Akademik Zərifə Əliyeva adına liseydə və Bakı Dövlət Universitetinin nəzdində “Gənc İstedadlar” liseyində təsviri sənət müəllimi kimi çalışır.  Bununla bərabər gənc pedaqoq Azərbaycan Dövlət İqtisad Universitetinin “Menectment sahələri üzrə idarəetmə ixtisası” üzrə təhsil alır.
Daim yaradıcılıq axtarışında olan rəssam öz yaradıcılığında qrafikanın dəqiq xətlərini rəngkarlığın canlı palitrası ilə birləşdirir. Onun “Azərbaycan-doğma diyar”, "Nar ilə natürmort", "Qızılgüllərlə natürmort", "Pəncərədən görünüş", “Azərbaycan bir rəssamın gözündə” kimi yağlı boya işləri, eləcə də "Novruzun ətri", "Rəsmlərdə Nəsimi" və "Meksika" və s. kimi qrafik əsərləri rəng harmoniyası və ideya dərinliyi ilə seçilir.
2020-ci ildən Azərbaycan Rəssamlar İttifaqının üzvü olan Təranə Əhmədova bir çox beynəlxalq və yerli sərgilərdə iştirak edib, müxtəlif mükafatlara layiq görülüb. Onun üçün rəssamlıq təkcə texnika deyil, dünyaya fərqli baxmaq sənətidir. Gənc rəssamın ən böyük arzusu şagirdlərinə bu sənəti sevdirmək, onların qəlblərinə rənglər vasitəsilə toxunmaqdır. Ən böyük uğuru isə şagirdlərinin həyatına sənət vasitəsilə toxuna bilməsidir. 
Pedaqoq rəssamın uşaqlar üçün təşkil etdiyi tanınmış rəssamlarımızla görüşlər, sərgilər və yaradıcılıq düşərgələri onların həm bacarıqlarını, həm də milli mənlik şüurunu inkişaf etdirir. Təranə müəllim ənənəvi üsullardan uzaqlaşaraq şagirdlərinə “görməyi” öyrədir. Müəllim  hər zaman şagirdlərinə deyir: 'Bayrağımızın üç rəngi kimi siz də üç istiqamətdə inkişaf etməlisiniz – bilik, yaradıcılıq və məhəbbətlə. Təranə xanım üçün hər bir şagird, özünəməxsus rənglərlə işlənən bir tablodur. Rəssamın pedaqoji fəlsəfəsi sadədir:  "İncəsənət yalnız çəkmək deyil, görmək bacarığıdır." Buna görə də onun yetişdirdiyi hər bir uşaq, yalnız rəssam deyil, həm də dünyanı gözəlliklə qəbul edən bir sənətsevər kimi böyüyür. Palitrasında milli rənglər, fırçasında vətən sevgisi, dərslərində isə gələcəyin istedadları olan bir ömür yolu... Təranə Əhmədovanın həyatı sübut edir ki, "müəllim" sözü ilə "rəssam" sözü eyni cümlədə olanda, nəticə həmişə şedevr olur.

Ziyarət Qəhrəmanova-Cabarova
Sənətşünas,
Azərbaycan Dövlət Rəsm Qalereyasının böyük elmi işçisi, ARİ-nın Prezident təqaüdçüsü