BMA-da ustad dərsi keçirilib

13 aprel 2025-ci il tarixində Üzeyir Hacıbəyli adına Bakı Musiqi Akademiyasında “SİMURQ” musiqi-təhsil layihəsi çərçivəsində keçirilən ustad dərsdə ictimai xadim, şairə, 2007-ci ildən Heydər Əliyev Fondunun Rusiya nümayəndəliyinin rəhbəri, “Baku” jurnalının təsisçisi və baş redaktoru, 2011-ci ildən isə Fondun vitse-prezidenti, Bakı Beynəlxalq Multikulturalizm Mərkəzinin Himayəçilik Şurasının üzvü Leyla xanım Əliyeva iştirak etdi.

P.İ.Çaykovski adına Moskva Konservatoriyasının dosenti, tanınmış pedaqoq Tatyana Titova tərəfindən ustad dərsləri üç gün ərzində keçirilmişdir.

Uzun illərdir “Simurq” layihəsi çərçivəsində təşkil olunan ustad dərsdə müxtəlif yaş kateqoriyalarından olan gənc pianoçular iştirak etdilər.

Azərbaycanın Xalq artisti, BMA-nın beynəlxalq əlaqələr, sosial məsələlər və ictimaiyyətlə əlaqələr üzrə prorektoru, professor Yeganə Axundova və “SİMURQ” layihəsinin rəhbəri, BMA-nın “Kamera ansamblı” kafedrasının müəllimi, beynəlxalq müsabiqələr laureatı, pianoçu Səidə Tağızadə Leyla xanımı qarşılayaraq, onu ustad dərsin gedişi ilə yaxından tanış etdilər. Leyla xanım böyük maraqla gənc musiqiçilərin ifasını dinlədi, dərs prosesi ilə bağlı suallar verdi və bütün iştirakçılara gələcək fəaliyyətlərində uğurlar arzuladı.