İlqar Əlfioğlu:

Nəriman Nərimanov - 155

Xalqımızın tarixində, ətrafında bu gün də çılğın mübahisələr açılan əvəzsiz rol oynamış Nəriman Nərimanovun doğum günüdür...

Məndən soruşsalar, onun barəsində yazılan ən dəyərli kitabın rəhmətlik yazıçımız Çingiz Hüseynovun "Doktor N" romanı olduğunu ürəklə deyərdim, çünki oxucunu ilk növbədə düşünməyə, zamanında "Şərqin Lenini" adlandırılan bir şəxsiyyətin, onun Bakıdakı əzəmətli heykəlinin başına gələnlərin misalında öz taleyimiz üzərində fikirləşməyə vadar edir.

Mən bu romanı yazıçının şəxsi arzusu ilə özünün sağlığında tərcümə etmişdim. Və bəlli səbəblərdən, çox istəyirdim ki, kitabı doğma dövlətimizin sifarişi ilə çap etdirək və bu da hər iki tərəfin bir növ bəraəti olsun. Bunu Çingiz müəllimin özü də, məndən fərqli olaraq, bir az inamsız arzulayırdı.

Təəssüf ki, buna nail ola bilmədim, xaricdəki "təəssübkeş" provakatorlardan biri yaşı ötmüş Çingiz müəllimi təhrik edərək, ondan qəribə, telefon söhbətlərimizlə qəti səsləşməyən bir intervyu alıb öz efirində "partlatdı", beləliklə, mənim arzum da puç oldu. Sonra, yazıçı da dünyasını dəyişdi...

Bunları sizə yazmaqda bircə məqsədim var. Çap üçün şəxsi vəsaitim olmadığından kitabı ilkin abunə yolu ilə məhdud sayda nəşr etdirmək istəyirəm.

Odur ki, bu postuma reaksiya olsa, bir hesab da açıb paylaşacam.

İstəyirəm ki, "Doktor N" satışda olmasın, onu yalnız oxuyacağına arxayın olduğum dostlar alsın.

Böyük çıxmasın, amma bu, tarix üçün gərəkdir...

* * *

Xatire Bashirli

Böyük azərbaycanlıya min rəhmət!

Эльдар Тагиев

Nərimanov millətimizin böyük oğullarından biridir. Heyif ki, bəyənməyənlər olduğu kimi, onu özünün inhisarına alanlar da var. Hər iki tərəf yanlışlığa yol verir.

Mir Gaffar Zadeh

Öz qövmümüzün başına əngəl-kələfiz biz...

Vallah, adam deməyə də söz tapmır. Hər addımbaşı o kişini urvatdan salmaqdansa elə birdəfəlik heykəlini də söksünlər, metronun da adını dəyişdirib Qərbi Azərbaycan stansiyası qoysunlar, bəlkə onda ürəkləri soyuyar bu manqurtların.

Arzu Qaziyeva

N.Nərimanov haqqında filmim var, yutuba da yükləmişəm: "bir karyeranın tarixçəsi", orda Nərimanovun həyatının son illərinə dair ilk dəfə maraqlı məlumat da yer alıb.

Kitabı da böyük məmnuniyyətlə oxuyaram.

Акрам Багиров

Nəriman Nərimanovun şəxsi fondu bizdə— Əlyazmalar İnstitutunda mühafizə ediıir. Biz bu gün Doktor Nərimanova həsr olunmuş tədbir keçirdik, yəqin ki, saytımızda bu haqda məlumat olacaq. Maraqlı məruzələr oxundu, sərgi də təşkil edilmişdi. İnşəAllal sənin tərcümə etdiyin kitab da çap olunar.

Etibar Ebilov

Mən də o kitaba abunə olaram.

Sizin tərcümə etdiyiniz bir neçə kitabı oxumuşam.Sadəcə olaraq əladır.

Nizami Ismayil

Sağ olun İlqar bəy.Görəsən Nəriman Nərimanovun əleyhinə danışanların doktor Nərimanla həmyaşıd olan babaları əllərində silah 11 -ci orduya qarşı neçə ay,neçə gün vuruşublar ?Bunlar hələ də oxuyub anlamayıblar ki əgər Nəriman Nərimanov olmasaydı Azərbaycan SSRİ nin tərkibinə Dağıstan,Tatarıstan kimi muxtar respublika,bəlkə də muxtar vilayət kimi daxil olub müstəqilliyini itirəcəkdi Hələ onun Mustafa Kamal Paşa Atatürkə ingilis, fransız,ruslar üzırində qələbəsində göstərdiyi tarixi köməkliyini demirik.Allah doktor Nəriman Nərimanova qəni qəni rəhmıt eləsin,məkanı behiştlik olsun.Nur içində yatsın.

Рена Рзаева

Allah rəhmət eləsin böyük şəxsiyyətə! Onun milləti üçün etdiklərini millətin 95 faizi bilmir! Hardan biləsidir ki?! Bazar-şou verilişlərini həsrətlə gözləyən təbəqə N.Nərimanovu dərk edər sizcə?!

Ibrahim Mehdi

İyirmi birinci əsrdə haqlı olduğumuzu, tarixi ədalətsizliyə məruz qaldığımızı sübut edə bilmiriksə, ötən əsrin əvvəllərində şovinizmə,qəsbkarlığa qarşı təkbaşına müqavimət göstərən dəyərli ziyalılarımızın hansı məhrumiyyətlərlə üzləşdiyini təsəvvür etmək çətin olmaz...

Allah rəhmət eləsin, ruhu şad olsun!

QEYD. Başlıqlar "Facebook" sosial şəbəkəsindəki başlıqla eynilik təşkil edir.