Xalq rəssamı Sirus Mirzəzadənin "Xəyalların qanadlarında" adlı fərdi sərgisi keçirildi

Yanvarın 31-də Azərbaycan Milli İncəsənət Muzeyində Xalq rəssamı, müasir təsviri sənətin tanınmış nümayəndələrindən biri Sirus Mirzəzadənin “Xəyalların qanadlarında” adlı fərdi sərgisinin açılış mərasimi keçirilib. Çoxsaylı mədəni və ictimai xadimlərin, sənətsevərlərin qatıldığı tədbirdə qonaqları salamlayan Azərbaycan Milli İncəsənət Muzeyinin direktoru, sənətşünaslıq üzrə fəlsəfə doktoru Şirin Məlikova Sirus Mirzəzadə yaradıcılığının özünəməxsusluğundan danışaraq onun monumental və dəzgah rəngkarlığı, eləcə də qrafika sahələrində ərsəyə gətirdiyi əsərlərinin təsviri sənətimizə verilən dəyərli töhfələr olduğunu bildirib. Daha sonra Xalq rəssamı Salhab Məmmədov, Azərbaycan Rəssamlıq Akademiyasının rektoru, Xalq rəssamı Natiq Əliyev, Xalq rəssamı Arif Hüseynov, Xalq yazıçısı Natiq Rəsulzadə çıxış edərək sənətkarın həyat və yaradıcılığının müxtəlif yönlərinə nəzər salıblar və Sirus Mirzəzadənin zəngin sənət dünyasını əks etdirən bu sərginin vacib əhəmiyyətini vurğulayıblar. 
Açılış mərasimində sərgiyə musiqi töhfəsi olaraq Əməkdar artist, tanınmış pianoçu Eldar Məmmədovun ifasında dünya şöhrətli bəstəkar Vaqif Mustafazadənin caz kompozisiyası səsləndirilib.
Sonda söz Xalq rəssamı Sirus Mirzəzadəyə verilib. O, yaradıcılığına verilən yüksək dəyərə görə öz sənət dostları və tədbir iştirakçılarına minnətdarlığını bildirərək qonaqları sərgi ilə tanış olmağa dəvət edib.
Azərbaycan Respublikası Mədəniyyət Nazirliyi və Azərbaycan Milli İncəsənət Muzeyinin birgə təşkilatçılığı ilə baş tutan sərgidə rəssamın 100-ə yaxın rəngkarlıq və qrafika əsəri, eləcə də müəllifi olduğu monumental rəngkarlıq nümunələrinin fotoşəkilləri nümayiş etdirilir. 
Ekspozisiyada əksəriyyəti zərif, füsunkar cazibədarlığa malik, sanki xəyallar aləmində, fərqli interyer və mənzərə fonunda əks olunmuş qadın portretləri, sevimli şanapipik təsvirləri, “Adəm və Həvva”, “Rəssam və model” silsiləsindən obrazların xarakter və emosiyalarını ustalıqla verildiyi süjetli səhnələr, sənətkarın zəngin təxəyyül və yüksək bədii zövqünün ərsəyə gətirdiyi digər tablolar yer alıb. “Qırmızı səhər”, “Röyalarda”, “Şirin xəyallarda”, “Şanapipiklə görüş”, “Lampa işığında” və lirik əhval-ruhiyyənin hökm sürdüyü onlarla rəngkarlıq, qrafika əsərində müəllifin interpretasiyasında özünəməxsus Şərq ab-havası, mifologiya, rəssamın genetik yaddaşından qaynaqlanan miniatür üslubu, eləcə də xalça, muğam kimi qiymətli mədəni irsimizin təzahürlərini görmək olar. 
Sirus Mirzəzadənin bədii fəaliyyətinin aparıcı istiqamətini təşkil edən monumental boyakarlıq sahəsi, Bakı, digər şəhər və rayonlarda yerləşən binaları bəzəmiş freska, mozaika və vitrajların fotoşəkilləri sərginin bir hissəsini təşkil edərək rəssamın çoxşaxəli yaradıcılığı haqqında dolğun təsəvvür formalaşdırır.  
Qeyd edək ki, sərgi 1 mart 2025-ci il tarixinədək davam edəcək.

Geniş fotoreportajla tanış olmaq üçün linkə daxil olun (TIKLAYIN):

https://azpress.az/home/show-news688