Təyyarə qəzasında xəsarət alanların SON VƏZİYYƏTİ

Ötən il dekabrın 25-də Bakıdan Qroznıya uçan “Azərbaycan Hava Yolları” QSC-nin (AZAL) “Embraer E-190” sərnişin təyyarəsinin Qazaxıstanın Aktau şəhəri yaxınlığında qəzaya uğramasından bir ay ötür.

Azərbaycan prezidenti İlham Əliyevin müvafiq sərəncamı ilə aviaqəzanın səbəblərinin araşdırılması üçün Dövlət Komissiyası yaradılıb. Sənədə əsasən, dövlət orqanlarına, o cümlədən Səhiyyə Nazirliyinə və Tibbi Ərazi Bölmələrini İdarəetmə Birliyinə (TƏBİB) müvafiq tədbirlər görmək tapşırılıb.

Səhiyyə Nazirliyinin mətbuat xidmətindən verilən məlumata görə, sərəncamdan irəli gələn müvafiq tapşırıqların icrası olaraq, aviasiya qəzası nəticəsində xəsarət almış vətəndaşlarımızın ölkəyə qayıtması təmin edilib, onların müalicəsi üçün lazımi şərait yaradılıb. .

“Yeni Klinikada yerləşdirilən 17 nəfərdən 4-ü birbaşa tibb müəssisəsinin reanimasiya şöbəsinə, 13-ü isə stasionar şöbəyə yerləşdirilib. Təxliyə edilən xəstələrdə bədənin müxtəlif hissələrinin zədələnməsi (sınıqlar, əzilmələr, kəllə-beyin travması, döş qəfəsinin küt travması, ikitərəfli pnevmotoraks, tənəffüs çatışmazlığı və s).

Onların hər biri ixtisaslı tibb mütəxəssisləri (ortoped-travmatoloq, neyrocərrah, reanimatoloq, torakal cərrah, ümumi cərrah, infeksionist) tərəfindən müayinə olunub, həmçinin zəruri diaqnostik müayinələrdən keçirilib. Təxliyə edilən 17 yaralıdan 12-si artıq ambulator müalicə üçün evə buraxılıb. Onların tam sağalma prosesinə yaşadıqları yer üzrə müvafiq yerli həkimlər nəzarət edir.

Qəzada yaralanan 3 nəfər əməliyyat olunub. Hazırda 4 xəstənin (1 kişi və 3 qadın) stasionar müalicəsi davam etdirilir. Reanimasiya şöbəsində müalicəsini davam etdirən bir xəstənin vəziyyəti stabil, lakin ağır, stasionarda müalicəsini davam etdirən digər üç nəfərin vəziyyəti isə qənaətbəxş qiymətləndirilir”, - deyə məlumatda bildirilir.