AZAL-ın təyyarəsinin “qara qutu”ları ilə bağlı YENİ MƏLUMAT

Qazaxıstanda AZAL-ın qəzaya uğrayan təyyarəsindən alınan şifrəsiz məlumatları öyrənirlər.

Qazaxıstan Nəqliyyat Nazirliyinin mətbuat xidməti xəbər verir ki, “Qazaxıstan Respublikasına gələn registratorların deşifrə edilmiş məlumatları da mütəxəssislər tərəfindən öyrənilir”.

Aktau yaxınlığında qəzaya uğrayan “Azərbaycan Hava Yolları” QSC-yə məxsus AZAL sərnişin təyyarəsinin qara qutuları Braziliyadan Qazaxıstana gətirilərək rəy verilməsi üçün səlahiyyətli komissiyaya təhvil verilib.

Həmin gün təyyarə qəzasını araşdırmaq üçün dövlət komissiyası yaradılıb. Uçuş registratorlarının dekodlanması bu komissiyanın səlahiyyətindədir.

Cinayət işi üzrə istintaqın tam və hərtərəfli aparılmasını təmin etmək məqsədilə zəruri istintaq-əməliyyat tədbirləri davam etdirilir. Hüquqi əməkdaşlıq çərçivəsində Azərbaycan Respublikası və Rusiya Federasiyasına beynəlxalq istintaq sorğuları göndərilib.

Xatırladaq ki, AZAL-ın Bakıdan Qroznıya uçan sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarədə olan 67 nəfərdən (5-i ekipaj üzvü olmaqla) 38-i ölüb, 29-u sağ qalıb.

İlkin məlumatlara görə, təyyarə Rusiya hava məkanında xarici və texniki təsirlər nəticəsində qəzaya uğrayıb.