Uşaq yazıçısı Gülzar İbrahimova Kürdəmirdə oxucularla görüşdü

Mərkəzi Aran Regional Mədəniyyət İdarəsi Kürdəmir rayon Mərkəzləşdirilmiş Kitabxana Sisteminin Mərkəzi Kitabxanasının təşkilatçılığı ilə Kürdəmir şəhər Tofiq İsmayılov adına 1 №-li və Qarabucaq qəsəbə tam orta məktəblərdə uşaq yazıçısı, Prezident təqaüdçüsü, M.Ş.Vazeh adına Yasamal rayon Mərkəzi Kitabxanasının Fəxri oxucusu Gülzar İbrahimova ilə görüş keçirildi.
Tədbirin aparıcısı, yazıçı Yadigar Təvəkkül  tədbir iştirakçılarına Gülzar İbrahimovanın həyat və yaradıcılığı haqqında məlumat verdi. Uşaqlar G.İbrahimovanın  Vətən, torpaq, şəhidlər, ana, bayraq, təbiət və s. haqqında şeirlərini söylədilər, səhnəciklər göstərdilər, mahnılar ifa etdilər. 
Yazıçı G.İbrahimova uşaqlara yeni yazdığı şeirlərini  söylədi, mahnılarını ifa etdi,  onlara “Kürdəmirin sirri” nağılını hədiyyə etdi. 
1 №-li tam orta məktəbin direktoru Vüqar Nəsirov, Qarabucaq qəsəbə orta məktəbin direktoru Nizam İsmayılov, Kürdəmir rayon MKS-nin direktoru Valeh Feyzullayev, Qarabucaq qəsəbə kitabxana filialının müdiri Fəqan Qasımov yazıçıya səmimi görüşlərə görə təşəkkür etdilər və ona  yaradıcılıq uğurları arzuladılar.  
Yazıçı G.İbrahimova uşaqlara  hədiyyələr verdi, yeni yazdığı kitablarını Mərkəzi Kitabxanaya, Qarabucaq qəsəbə kitabxana filialına və məktəb kitabxanalarına hədiyyə etdi. 
Görüşlərdən sonra yazıçı Kürdəmir rayon Mərkəzi Kitabxanasında və Qarabucaq qəsəbə kitabxana filialında oldu. 
Kitabxana filialının fəal oxucusu Nuray Məmmədova tədbirin təşkilində fəal iştirakına görə “Qızıl açar” Diplomu ilə təltif olundu. Qarabucaq qəsəbə tam orta məktəbinin istedadlı şagirdləri şeir yazmaqla bağlı Gülzar İbrahimovadan dəyərli məsləhətlər aldılar.
Sonda xatirə  fotoları çəkildi.