Aktauda baş verən təyyarə qəzasında xəsarət alanların son vəziyyəti açıqlanıb

Bakıdakı “Yeni Klinika” tibb müəssisəsində Qazaxıstanın Aktau şəhəri yaxınlığında baş vermiş təyyarə qəzası nəticəsində xəsarət alan 6 nəfərin (2 kişi, 4 qadın) müalicəsi davam etdirilir.

Bu barədə TƏBİB məlumat verib.

30 dekabr 2024-cü il tarixində stabil, ağır vəziyyətdə tibb müəssisəsinin reanimasiya şöbəsinə yerləşdirilən zərərçəkənin kliniki və hemodinamik göstəriciləri stabilləşdikdən sonra xəstəxanaya yerləşdirilib. Qeyd edək ki, həkim-travmatoloq Elşən Nəcəfovun osteosintez əməliyyatı (sınıqlar zamanı sümüklərin anatomik quruluşunun bərpası) əməliyyatı apardığı xəstənin vəziyyəti hazırda qənaətbəxş qiymətləndirilir.

Travmatik koma vəziyyətində (2 nəfər) kəllə-beyin travması, müxtəlif dərəcəli sınıqlar, döş qəfəsinin travması və pnevmogemotoraks ilə daxil olan xəstələrin reanimasiya şöbəsində müalicəsi davam etdirilir. Hazırda onlara tənəffüs dəstəyi verilir. Onların vəziyyəti stabil kritik qiymətləndirilir.

Qeyd edək ki, əvvəllər xəstəxanaya yerləşdirilən 14 nəfərdən daha 2 nəfər ambulator müalicəyə buraxılıb. Tibb müəssisəsində qalan 3 zərərçəkənin stasionar müalicəsi davam etdirilir, vəziyyətləri qənaətbəxşdir.