Bakıda Azərbaycan Din Xadimlərinin Forumu keçirilib

Dekabrın 23-də Dini Maariflə İş üzrə Dövlət Komitəsinin təşkilatçılığı ilə Bakıda “Dini təhsilin aktual problemləri: ənənələr, təcrübə və perspektivlər” mövzusunda Azərbaycan din xadimlərinin Forumu keçirilib.

Burada dövlət rəsmiləri, ilahiyyatçı və mütəxəssislər, eləcə də respublikanın bir çox rayonlarından 100-dən çox müxtəlif konfessiyaya malik din xadimləri iştirak edib.

Əvvəlcə Azərbaycanın dövlət himni səsləndirilib. Ulu öndər Heydər Əliyevin və şəhidlərin xatirəsi bir dəqiqəlik sükutla yad edilib.

Sonra Prezident Administrasiyasının humanitar siyasət, diaspor, multikulturalizm və din məsələləri şöbəsinin müdiri Fərəh Əliyev Prezident İlham Əliyevin forum iştirakçılarına müraciətini oxuyub.

Tədbirdə ərazidəki dini ibadət yerləri, ziyarətgahlar, qəbiristanlıqlar, ixtisaslaşdırılmış satış məntəqələri haqqında məlumat bazasını sistemli şəkildə toplayan AMİN layihəsinin video təqdimatı olub.

Forumun keçirilməsində məqsəd dini təhlükələr barədə cəmiyyəti məlumatlandırmaq, dini maarifləndirmə prosesində dini liderlərin rolunu artırmaq, o cümlədən dini icmaların və dini liderlərin fəaliyyəti, üzləşdikləri çətinliklərlə bağlı rəy və təkliflərin öyrənilməsidir.