Cavadxan Qasımov:

NDU tələbələri “Sirab” mineral sular zavodunda

Naxçıvan Dövlət Universitetinin İqtisadiyyat və idarəetmə fakültəsinin "Beynəlxalq ticarət və menecment" kafedrasının tədris-pedaqoji tapşırıqlarına əsasən tədrisi ingilis dilində olan III kurs iqtisadiyyat ixtisasının tələbələri ilə növbəti dərs “Sirab” mineral sular zavodunda oldu. Kafedranın müəllimi, Vüsal Hüseynovun tədris etmiş olduğu "Menecment" fənninin tədrisi proseslərində istehsal müəssisələrinin idarə olunması və bu istiqamətdə menecerin peşəkarlıq xüsusiyyətlərinin yerində öyrənilməsi, kadr və mütəxəssislərin bu proseslərdə düzgün seçilməsi və cəlb olunması, istehsal müəssisəsinin zəruri resurslardan düzgün və məqsədyönlü istifadə olunması kimi məsələlər tələbələrin olduqca maraqlarına səbəb oldu.

Zavodun keyfiyyətin idarə olunması sahəsi üzrə şöbə müdiri Ruslan müəllimin verdiyi məlumatlar menecment fəaliyyətinin müasir iqtisadi şərait üçün olduqca aktual hesab olunan tərəflərinin ortaya qoyulmasında əhəmiyyətli oldu. Eyni zamanda, aydın oldu ki, “Sirab” mineral sular zavodu, ilin bütün fəsillərində əhalinin məşğulluq probleminin həlli sahəsində mühüm göstəriciləri də özündə əks etdirməkdədir. Belə ki, qış fəslində 220-yə yaxın, yay fəslində isə, təlabatın çox olduğunu nəzərə alaraq, 250-dən çox iş yerinin olduğu ifadə olundu. Bildirildi ki, dünyanın 18 ölkəsinə sirab ixrac olunur.

İstehsal prosesləri ilə yaxından tanış olan tələbələr, menecment sahəsində qazanmış olduqları nəzəri biliklərlə, müvafiq istehsal müəssisəsində təcrübi baxımdan sintez təşkil edən yanaşmanın məmnunluğunu ifadə etdilər. Bu sırada, menecer olaraq, ixtisaslaşmanın, formalaşmanın və kadr hazırlığı proseslərinin olduqca yüksək əhəmiyyətini qeyd etdilər.

“Sirab” mineral sular zavodunun insan resurslarının idarə olunması şöbəsinin müdiri Elçin müəllim də, tələbələrimiz üçün əmək resurslarından istifadə olunmasının optimal və səmərəli yollarının müəyyən olunması sahəsində tələbələrə məlumatlar verdi. Kadr potensialının idarə olunması proseslərində motivasiya olunacaq meyarlar, təhlükəsiz əmək şəraitinin yaradılması sahəsindəki tədbirlər, xüsusilə də, insan və istehsal anlayışlarının düzgün əlaqələndirilməsinin təminatqabiliyyətli göstəricilər ilə tamamlanmasına vermiş olduğu təkan barəsində məlumatlar verilmişdir.

Zavodla tanışlıqdan sonra, Ruslan müəllimlə Elçin müəllim tələbələrimizin çoxsaylı suallarına təmkinlə və həvəslə məlumatlar verdilər.

Yaratdığı şərait üçün Naxçıvan Dövlət Universitetinin Rektoru, tələbələrin sevimlisi Elbrus müəllimə və “Sirab” mineral sular zavodunun müdiri Namiq müəllimə minnətdarlıq edirik.

Xeyirli olsun!