BMA-da konsert-konfrans keçirilib

18 dekabr 2023-cü il tarixində Üzeyir Hacıbəyli adına Bakı Musiqi Akademiyasında Xalq artisti, professor Fərəc Qarayevin 80 illik yubileyi ərəfəsində konsert-konfrans keçirildi. Qara Qarayev adına konfrans zalında baş tutan tədbir Musiqi nəzəriyyəsi kafedrasının təşəbbüsü ilə təşkil olundu. Konsert proqramında bəstəkarın fortepiano əsərləri Xalq artisti, professor Ülviyyə Hacıbəyova və Əməkdar müəllim, professor Nərminə Quliyevanın magistrant tələbəsi Zəhra-Cahan Şıxaliyevanın ifasında səsləndi. Ülviyyə Hacıbəyova kimi sənətçinin ifasıtədbirə xüsusi zövq qatdı. Uzun illər bəstəkarla yaradıcılıq ünsiyyətində olan pianoçunun xatirələri tədbirin qonaqları və iştirakçıları tərəfindən böyük maraqla qarşılandı.

Konsfransda Musiqi nəzəriyyəsi kafedrasının müdiri, Əməkdar müəllim Könül Nəsirova, dosentlər Aliyə Məmmədova və Turan Məmmədəliyeva,  Musiqi tarixi kafedrasının dosenti, Əməkdar müəllim Xatirə Həsənzadə çıxış etdilər.  Könül Nəsirova sənətkarın yaradıcılığını işıqlandırdı və pedaqoji fəaliyyətinə nəzər yetirdi.   Bəstəkar  Aliyə Məmmədova  qürur hissi ilə qeyd etdi ki, qazandığı nailiyyətlərə görə müəllimi Fərəc Qarayevə minnətdardı. Dosent Turan Məmmədəliyeva sənətkarın kinomusiqisi haqqında fikirlərlə bölüşərək, musiqi parçalarından nümunələr göstərdi. Əməkdar müəllim Xatirə Həsənzadə, Fərəc Qarayevin musiqi dünyasını şairanə-obrazlı şəkildə təsvir etdi.

Sonda konsert-konfransda bəstəkara  ünvanlanan təbrik videoçarxları nümayiş olundu.