Uğura gedən yolda incəsənət əzmi ilə

Gənc rəssam Mədinə Həbib 

Müasir dövrümüzdə incəsənətin müxtəlif sahələrində istedadlı olan gənclərimiz yetişir. Bu gənclər arasında kiçik yaşlarından seçdiyi sahəyə olan marağını artırmaq, öz üzərində durmadan çalışaraq yeniliklər edən, təkmilləşdirən və ən əsası öz dəst-xəttini formalaşdırmağı bacaran gəncə rast gəlmək çox az hallarda baş verir. Rəssamlıq sahəsi insanın daxili aləmindəki duyğularını cəmiyyətlə, insanlarla bölüşməyin ən maraqlı yoludur. Eyni zamanda rəssamlıq olduqca dərin bir sənətdir. Bu isə ciddi təxəyyül, əmək, səbr və mütaliə tələb edir. Düşünürəm ki, istedadlı olmaq xüsusi bir bacarıqdır və bu zamanla qazanılan bir şey yox, doğuşdan gələn bir hisdir. 
Azərbaycan rəssamlıq sənətinin qədim tarixə malik olan ənənələrindən məharətlə istifadə etmək, müxtəlif janr və üslublarda, sadə və mürəkkəb kompozisiyalı, bir-birindən rəngarəng özünəməxsus əsərlər ərsəyə gətirmək, hazır olduqdan sonra o əsəri izləyib zövq almaq qədər asan deyildir. Tarixdə iz buraxmış fırça ustalarımızın möhtəşəm əsərlərindən bəhrələnib ruhlanaraq, bu istiqamətdə uğurlu addımlar atan gənclərimizdən Mədinə Həbibin adını xüsusi qeyd edə bilərik. 
Həbib Mədinə Rüfət qızı 25 dekabr 2008-ci il tarixində Bakı şəhərində hərbçi ailəsində anadan olub. O, yeddinci sinifə qədər Paşa Nəzərov adına 60 saylı tam orta məktəbdə təhsil alıb. 2020-ci ildə isə Telman Abbasov adına 225 saylı tam orta məktəbdə təhsilini davam etdirib. Gənc qızımız hələ yaşının az olmasına baxmayaraq kağız üzərində rəngli karandaş, sulu boya, quaş, pastel, tuş, kətan üzərində yağlı boya, akril boyalarla bənzərsiz əsərlər yaradaraq özünə seyrçi məhəbbəti qazanmağı bacarmışdır. Yaratdığı kompozisiyalarda fırçasının həzin hərəkətləri, təsvirlərin ahənglə düzülüşü, rənglərin harmoniyası açıq-aşkar diqqəti cəlb edir desək, yanılmarıq. Indi isə biraz keçmişə qayıdaraq Mədinənin incəsənət sevgisinin necə yaranmasından söhbət açaq. 
Mədinə Həbib çox kiçik yaşlarından rəsmə həvəs göstərib. Hələ altı yaşı varkən müxtəlif kitab, jurnal, televiziya ekranlarında görüb ilhamlandığı obrazları canandırardı. Qızlarındaki bu istedadı görən valideynləri ona biganə yanaşmayıb dəstək olaraq incəsənət sahəsinə yönləndirməyi qərara alırlar. Mədinə bu sənətinin sirlərini dərindən öyrənməsi, həmin sahəyə baxışlarını daha da formalaşdırması üçün ilk müəlliməsi olan Azərbaycan Rəssamlar İttifaqının üzvü, "Esmiralda"- Uşaq və Yeniyetmə Rəsm Studiyasının rəhbəri, dizayn ixtisaslı rəssam və pedaqoq Esmiralda Tağızadədən dərslər alır. Keçən zaman, ötən illər ərzində öz dəst-xəttini formalaşdırmağa nail olan gənc rəssamımız öz uğurları ilə ölkəmizdə, eləcə də ölkə xaricində səs-səda salmağı bacarır. 2016-cı ildən etibarən davamlı olaraq sərgi və festivallarda iştirak edərək bütün dünya üzrə müxtəlif çoxsaylı müsabiqələrin qalibinə çevrilir, mükafatlar əldə edir. Bunlara misal olaraq "Misir Azərbaycan uşaqlarının gözü ilə", Saf rənglər" adlı IV Beynəlxalq Uşaq və Yeniyetmə yaradıcılıq festivalı, "Naxışın sirləri", "Həmrəylik", "Rəngli xəyallar", "Zərərli vərdişlərə yox de sağlam həyat tərzi seç", "Xonçalı novruz", "Doğma diyar Azərbaycan", "Rəngli dünya", "Zəfər", "Yeni il hədiyyəm", "Zəngilan etüdləri", "Zəfər günü", "Tarixin tozlu səhifələri", "Rəssam və təbiət","Zəfər 44", "Christmas miracle", "Zərif qadın", "Şərqin incisi", "Rəssamın kitabı", Arif Hüseynovun rəhbərliyi altında keçirilən, təşkilatçısı gənc sənətşünas Ziyarət Qəhrəmanova Cabarova olan  "Gənc istedadlar" fərdi sərgisini və s. sadalamaq olar.  Bu sərgidə Azərbaycan Respublikasının Xalq Rəssamı Arif Hüseynov Mədinənin rəngarəng əsərləri haqqında öz müsbət fikirlərini səsləndirmişdir. Onun öz üzərində daha da çalışaraq gələcəkdə tanınmış rəssam olacağına ürəkdən inandığını söyləmişdir.
Uğurlarının ardı-arası kəsilməyən Mədinə Həbib davamlı olaraq iştirak etdiyi sərgilərdə müxtəlif diplom və sertifikatlara layiq görülüb. 
"Misir-Azərbaycan uşaqların gözü ilə", "Naxışın sirləri", "Həmrəylik" (2018), "Azərbaycan-Odlar Yurdu", 1 İyun  Uşaqların Beynəlxalq Müdafiəsi Gününə həsr olunmuş (2019), "Rəngli xəyallar", "Doğma diyar Azərbaycan" (2020), "Xonçalı Novruz" (2022), "Zəfər-44", "Rəngli dünya" (2023) adlı müxtəlif mövzulu sərgi və müsabiqələr bu qəbildəndir. O, "Saf rənglər" IV və V beynəlxalq rəssamlıq festivalları (2016-2018), Nyu Yorkun Bruklin şəhərində keçirilən festivala uğurla qatılmış, "Təhlükəsiz dünya gələcəyi, nəqliyyat vasitələri" nominasiyası üzrə 1-ci yerə, 2020-ci ildə keçirilən "Zərərli vərdişlərə yox de, sağlam həyat tərzi seç!" rəsm müsabiqəsində və  2022-ci ildə "Gold time" beynəlxalq rəsm festivalında qrafika nominasiyasında 2-ci yerə layiq görülmüşdür. O, eyni zamanda "International - World Innovative Student Exhibition qalibi, 1-ci yer və qızıl medalın sahibidir. 
İstedad və bacarıqları saymaqla bitməyən, yaradıcılıq yoluna uğurla qədəm qoyan Mədinə Həbib rəssamlıqdan əlavə, idmanla da məşğul olur. O, Azərbaycan Respublikası "Vin Çun" döyüş sənəti federasiyasının üzvüdür. Federasiyada Əməkdar məşqçi Asif Sayadovun rəhbərliyi altında peşəkar dərslər alır. Dəfələrlə respublika üzrə çempionatlarda iştirak edərək yüksək yerlər tutub. 
Bu gün Azərbaycanlı olaraq belə istedadlı gənclərimizi dünya üzrə ölkəmizi təmsil etdiyini, öz bacarığı ilə yaşıdlarına və digərlərinə nümunə olduğunu görmək olduqca qürurvericidir. Mədinə Həbibə çıxdığı bu yolda böyük uğurlar, bol yaradıcılıq əhval-ruhiyyəsi arzu edirik.

Ziyarət Qəhrəmanova Cabarova
Azərbaycan Dövlət Rəsm Qalereyasının Böyük Elmi İşçisi,
ARİ-nın “Gənc Sənətşünaslar” bölməsi üzrə prezident təqaüdçüsü, 
Hüsn-Art İncəsənət Mərkəzinin Elmi katibi