Şərurda kitab təqdimatı və şəhid ailələri ilə görüş olub

29 iyul tarixində AYB-nin üzvü Prezident mükafatçısı şairə Esmira Günəşin Naxçıvan şəhər Şərur rayon Mərkəzi Kitabxanasında kitab təqdimatı və şəhid ailələri ilə görüşü olub.

Təqdimatı Şərur rayonu Mərkəzi kitabxanasının direktoru Toğrul müəllim və kitabxana kollektivi təşkil edib. Naxçıvanın müxtəlif kənd və rayonlarından gələn şəhid ailələri tədbirdə iştirak ediblər. Tədbir şəhidlərin bir dəqiqəlik sükutla yad edilməsi və Azərbaycan Respublikasının Himni ilə açıq elan olunub. İlk olaraq kitabxananın direktoru çıxış edərək, günün önəmindən danışıb, daha sonra isə kitabxana əməkdaşları şəhidlərimizin tanıdılması üçün kitabların önəmindən bəhs ediblər.

Tədbirin gedişatında şairə Esmira Günəş kitablarını təqdim etməsi üçün kürsüyə dəvət olunub. Şairə Esmira Günəş çıxışı zamanı 5 günlük Naxçıvan səfərində ziyarət etdiyi şəhid ailələrindən danışıb. Təbrin təşkili üçün kitabxana kollektivinə təşəkkürünü bildirərək "Cəsur Qəhrəmanlar", "Şimşəkdən Dənizə", "Cənnətin sakinləri", "Səmaya məktublar", "Mingəçevir Mələkləri", "Cənnətdən gələn hədiyyə", "Oğul düşmən çəpəridir", "Unutmadıq şəhidim", "Günəşin Nuru", "Sevgi damlası" kitablarını kitabxanaya hədiyyə edib. İlk Qarabağ savaşlarından ta bu günə qədər son şəhid olan igidlər də tədbir zamanı yad olunub.

Daha sonra tədbirdə iştirak edən şəhid ailələrinin hər biri səhnəyə dəvət olunaraq şəhid övladlarında danışıblar. Tədbir xatirə şəkilləri ilə yekunlaşdırıldıqdan sonra bütün qonaqlar kitabxana kollektivinin şəhidlərin adına təşkil etdiyi ehsan süfrəsinə dəvət olunublar.

Esmira Günəş