Hümbət Quliyev: 

İnsanların bir- birini tanımaq cəhdləri və ya səmimiyyət haqqında

(esse)

İnsan üçün həyati vacib məsələlərdən biri onun tərəfmüqabili tanıya bilməsidir. Yalnız tərəfmüqabili dəyərləndirdikdən sonra biz onunla "hara qədər" gedə biləcəyimizə qərar verə bilirik.

Tanımadığımız tərəfmüqabili qiymətləndirmək üçün ilk olaraq ağlımız işə düşür. Biz onun xarici görüşünə, danışığına, davranışına görə nəticə cıxartmağa çalışırıq. Bu məqamda baxanın intelekti, dünyağörüşü, əvvəlki həyat təcrübəsi çox önəmlidir.

Gözlər eyni zamanda ruhun da dünyaya açılan pəncərəsidir. Ruh yaradana aid olduğundan "yalan danışa" bilmir.

Gözlər sifətdə yeganə dürüst informasiya mənbəyidir. Elə bu səbəbdən yalan danışanlar ilk olaraq baxışlarını yayındırmağa çalışırlar.

Uşaqlarda bu özünü daha qabarıq göstərir.

Eyni zamanda təhtəlşüurumuz öz ayrıca analizini aparır. Buna intuisiya da deyilir. O, bizə nəticəni " xoş insandır" ya " xoş insan deyil" diaqnozu şəklində verir.

Bir vacib məqam. Qadınlar üçün əks tərəfi tanımaq daha vaclbdir, çünki bundan onların bütün həyatları asılı ola bilir. Bu səbəbdən Yaradan onlara kişilərdən daha üstün qabiliyyətlər verib. Məsələn, danışığın analizində kişi beyninin yalnız sol yarımkürəsi iştirak edirsə, qadında bunun üçün hər iki yarımkürə eyni zamanda fəaliyyətdə olur. Qadınların intuisiyaları da kişilərdən qat-qat güclüdür. Təcrübəli qadınlarda bu qabiliyyət təbii ki, daha mükəmməldir. Bu səbəbdən bütün dünyada qəbul edilib ki, qızlar həyatlarını bağlamaq istədikləri oğlanları analarına təqdim etsinlər. Anaların fikirləri bu işdə həlledici sayılmalıdır və bu düzdür.

Sadaladığım səbəblərdən kişilərin qadınlara “yalan sata bilmək” şansları çüzidir. Kişilər qadınlar qarşısında, "rentgen" qarşısında dayanmış kimidirlər və bunun da fərqində olmalıdırlar.

Qərblilər tanışlıq mərhələsində ev heyvanların reaksiyasını da önəmli sayırlar. Almanın iti ilk dəfə sizi

" yaxşı" qarşılamadısa, o ailə ilə dost olmağınız mümkün olmayacaq. Həqiqətən də itlərin insanları

" tanımaq" qabiliyyəti var, axı bundan onların da həyatları asılıdır. Min illər insanla birgə yaşayış onlarda bu xüsusiyyəti formalaşdırıb, yəqin.

Gördüyünüz kimi kişilərin öz cüzi bioloji imkanları ilə biri- birilərini tanımaq şansı cüzidir. Kişilərin iki şansı var, ya kişi tərəfmüqabil haqda qadının( həyat yoldaşı, dost xanım və s.) fikrini öyrənmək, ya da kişi tərəfmüqabilin özü haqda etiraflarını dinləməkdir. Belə etiraflar təbii ki, səmimi olmağı tələb edir.

Bu səbəbdən kişilər bir-birindən tez- tez xahiş edirlər ki, gəl səmimi olaq. Qadınlar heç vaxt bir- birindən səmimi olmağı tələb etmirlər, çünki, onlar bir- birini çox gözəl duyurlar.

Qadının qadını aldada bilməyi çox müşkül məsələdir, elə bu səbəbdən. Qadınlar kişiləri aldatmaq istəsələr, onların sol əllərinin çeçələ barmağının gücü buna artıqlaması ilə bəs edir.

Kişilər üçün etiraf etmək, səmimi olmaq çətin iş olduğundan min illərdir ki, kişilər mütəmadi olaraq bir yerə toplaşıb bunu yemək masası ətrafında etməyə çalışırlar. Düzdür, bunun üçün spirtli içkilərdən də istifadə edirlər, çünki içki dili açır.

Deyildiyi kimi ayığın ağlında olan, içkilinin dilində olur.

Bütün qeyri- müsəlman ölkələrində səmimiyyəti yaratmaq üçün “ içki” üsulundan geniş istifadə olunur.

Müsəlman adlanan ölkələrdə də bir çox insanlar bu üsulla "etiraflar etməyə” toplaşırlar.

Bu səbəbdən də içkisiz də səmimi ola bilən dostlarımızı çox dəyərləndirək.

P.S. Sonda həkim olaraq deməliyəm ki, içərək səmimiyyət əldə etmək istəyənlər, sağlamlıqlarını itirdiklərinin fərqində də mütləq olmalıdırlar.

Hümbət Həsənoğlu