"Qızıl top" sahibi Roberto Baconun evinə basqın edilib

Qiymətli əşyaları oğurlanan Bacı özü də xəstəxanalıq olub 

Tanınmış futbolçular mütəmadi olaraq, quldurların qurbanına çevrilirlər. Bu dəfə isə hədəf İtaliya yığmasının və eləcə də "Yuventus", "Milan" və "İnter" kimi klubların şərəfini qoruyan və 1993-cu ildə "Qızıl top " mükafatına layiq görülən 57 yaşlı Roberto Baco olub. İtaliyanın "Corriera della Sera" nəşrinin yaydığı məlumata görə, hadisə dünən gecə Avro-2024-də keçirilən İspaniya -İtaliya (1:0) matçı zamanı baş verib. Beş nəfər silahlı çağırılmamış qonaq Baco, arvadı və iki uşağı ilə birlikdə olduğu "Altavilla Bicentina"ni "ziyarət" edib. Baco onlara müqavimət göstərmək istəyərkən tapança ilə onun başından vurublar. Daha sonra isə onu ailə üzvləri ilə birlikdə bir otağa soxaraq qapını bağlayıblar. "Ziyarətçilər" 40 dəqiqə evdə təftiş aparandan sonra hadisə yerini tərk ediblər. Gedərkən onlar villadan qiymətli ziynət əşyaları, bahalı saat və pul aparıblar. 

"Qonaqlar" gedəndən sonra Baco saxlandiqlari otağın qapısını qıraraq polis çağırıb. Polis videokameraya baxandan sonra hadisənin çox təcrübəli bir banda tərəfindən peşəkarcasına törədildiyini bildirib. 

Xatırladaq ki, İtaliyanın üç məşhur klubunda forma geyinən Baco 1990, 1994 və 2998-ci illərdə ölkə yığmasının heyətində dünya çempionatında iştirak edib. 1993-cu ildə isə "Qızıl top" mükafatına layiq görülüb.

İNTİQAM Məmmədov